Accessibility links

якшәмбе, 4 декабрь 2016, Казан вакыты 09:19

Peterburg tolerantlıq şähäre bula alırmı?


Peterburgta milli küralmawçılıq cirlegendäge cinayätlärgä , nihayät, çik quyılır digän ömet uyandı.18 mayda başlanğan maxsus operatsiä näticäsendä şähärdä berniçä yıl eşläp kilgän ekstremistik yäşlär bandası qulğa alındı.Bandanıñ citäkçese Dmitriy Borovikov, operatsiä barışında qarşılıq kürsätep, citdi tän cäräxätläre ala Qulğa alınğannarnıñ eşe buyınça tikşerü bara. Afrika studentı Samba Lampsar, 3 yıl elek häläk bulğan 5 yäşlek çegän qızı, 2004 yılda üterelgän v'yetnam studentı Wu An' Tuannıñ bu törkem qorbannarı ikäne inde raslanğan."Milli cirlektäge cinayätlär buyınça ekspert Nikolay Girenkonıñ üleme dä şuşı neonatsistlar eşe.Bu- Nikolay Girenkodan "Şul's-88" törkeme turında äzerlängän ekspert beleşmäse öçen neonatsistlarnıñ üç aluı. Nikolay Girenkoğa höcümdä qatnaşuçılarnıñ isemnäre bilgele, tragediäneñ barlıq detal'läre öyränelgän, tizdän cinayätçelär xökemgä tartılaçaq",- dip belderde şähär prokuraturası. Prokuratura 9 yäşlek Xörşidä Soltanovanıñ ülemenä bu törkem säbäpçe tügel, digänräk qaraşta.Ä "Ajur"(Agentstvo jurnalistskix rassledovaniy") citäkçese Andrey Konstantinov Xörşidäneñ -bu banda qorbanı ikänlegendä şiklänmi."Üsmerlär üzläre Xörşidä, anıñ ike tuğan abıysı häm ätisenä höcüm waqıtında kem närsä eşlägänen bäynä-bäynä söyläp birdelär",-di Andrey Konstantinov.

Qulğa alınğan 13 keşeneñ kübese yulın "Şul's-88" isemle neonatsistlar törkemendä başlağan. Älege törkemneñ iseme yuq, ğomumän bu törkem konspiratsiä nigezendä tözelgän. Maqsatı- çit millät keşelären üterü. Höcümnäre ülemgä kitermiçä,. yaralaw belän genä çiklänsä, operatsiä uñışsız ütkärelgän dip sanala.Ä alarnıñ metro yanındağı qıynawları, qorbannarın yaralaw oçraqları yözlägän.Soraw alu waqıtında"kön dä kemne dä bulsa qıynıy idek, qaysı bersen iskä töşerep beteräseñ inde",-dip cawap birgän cinayätçelär.Prokuratura xezmätkärläre äytüençä, ekstremistlarnıñ barısı da üze belän pıçaq yörtä häm alar xoquq saqlaw orğannarına oçrağanda soñğı çikkä qädär qarşılıq kürsätergä, ülsä dä , çigenmäskä tieş .Soñğı waqıtta banda trotil häm dinamit tuplıy başlağan. Şul uq prokuratura xezmätkärläre süzençä, alar iyündä Peterburgta uzaçaq sammit aldınnan zur terakt eşlärgä cıyınğannar ikän.

Şähär gubernatorı Valentina Matvienko süzlärençä. bu yäşüsmerlär -qoral, qurçaq qına, qurçaqnı yörtüçelär bötenläy başqa keşelär. Alarnıñ maqsatı- sammit aldınnan Peterburgqa pıçraq yağu, cinayätçelär şähäre itep kürsätü. Yullar Mäskäwgä iltä. "Peterburgta ksenofobiä probleması bar ikänen inqar itep bulmıy . Ämma bu Peterburgqa ğına xas närsä tügel, ğomum megapolislar probleması. Ä Peterburgta tizdän "Tolerantlıq"programması eşli başlayaçaq", -dide Valentina Matvienko.

Gölzadä Kamalova, Sankt-Peterburg

XS
SM
MD
LG