Accessibility links

Кайнар хәбәр

Beslan terrorında ğäyeplängän Nurpaşa Kulaev ğömerlek törmä cäzasın aldı


Şulay itep, xökem qararı iğlan itelde - Beslan höcümendä qatnaşuda ğäyeplängän Nurpaşa Kulaev ğömerlek törmä cäzasına xökem itelä. Ğäyepläw yağı aña ülem cäzası taläp itkän ide, ämma Rusiädä älegä andıy cäzalar tuqtalıp torğan xäldä, şuña kürä xäkim Kulaev cäzasın ğömerlek törmä dip bilgeläde.

Nurpaşa Kulaevqa xökem comğa irtän Tönyaq Osetiäneñ Yuğarı mäxkämäsendä iğlan itelde, qararnı mäxkämä räise Tamerlan Aguzarov uqıdı:

Kulaev şulay itep Rusiä cinayät kodeksındağı 69-nçı matdäneñ 3-nçe öleşe nigezendä bar qalğan ğömeren qatı saqlanğan maxsus koloniädä ütkärügä xökem itelde. Qorbannarnıñ tuğannarı bu xökem qararın törleçä qarşı aldı, küpläre Beslan höcümen oyıtıruda ğäyeplängän häm mäxkämä qarşına basqan berdänber keşeneñ ülem cäzasına xökem itelüen telägän ide.

Ülem cäzasın Kulaev öçen ğäyepläw yağı da soradı. Ämma Rusiädä bügenge köndä ülem cäzaların çığaru tuqtatılıp torğan xäldä, şuña kürä dä mäxkämä aña mömkin bulğan başqa iñ yuğarı cäzanı birä. Tulayım alğanda Nurpaşa Kulaev totıqlar aluda, terrorda, keşe üterüdä, üterü omtılışında, qoral saqlawda, xoquq saqlaw xezmätkärlären üterüdä, häm alarnı üterügä omtıluda ğäyeplände.

Prokuratura mäxkämädä üze telägän xökem çığarılmasa da, qarardan qänäğät qaluın belderä, çönki anıñ öçen iñ möhime - Nurpaşa Kulaevnıñ ğäyepläw yağı däğwa itkän cinayätlär öçen ğäyeple dip tabıluı. Rusiä baş prokurorı urınbasarı Nikolay Şepel:

Ğäyepläwne mäxkämädä näq menä Şepel alıp barğan ide. Kulaev 2004-nçe yılnıñ 1-nçe sintäbrendä tağın 31 çäçän suğışıçısı belän bergä Beslan mäktäbendä yaqınça 1300-läp keşene totıq itep aluda, öç kön barğan qamawdan soñ anda başlanğan qan qoyuda 331 keşene üterüdä ğäyeplände. Totıq itep alınğannarnıñ da, hälak bulğannarnıñ da zur öleşen balalar täşkil itkän ide.

Moñardan tış xäkim anı, äle qamaw barışında uq 16 totıqnı üterügä qatnaşı buluda ğäyeple dip taptı. Kulaev isä üzeneñ kemgä dä bulsa zian kiterüen kire qaqtı, suğışçılar törkemenä köçläp qatnaştırıluı xaqında belderde. Comğa iğlan itelgän xökem qararında, Kulaevnıñ bu belderüläre nigezsez, şahidlär dä, anıñ elekke çorda äytkän üz süzläre dä monı kire qağa, dielä.

26 yäşlek Nurpaşa Kulaev mäxkämäse näq ber yıl elek, 2005-neñ 17-nçe mayında başlanğan ide.

Kärim Kamal
XS
SM
MD
LG