Accessibility links

якшәмбе, 11 декабрь 2016, Казан вакыты 11:11

Samar şähär Dumasın bizgäk tota


Menä yıldan artıq inde şähär duması talaş oyasına äylände. Deputatlar ikegä bülende. Bol'şeviklarğa häm azçılıqlarğa. Bol'şevik süzen işetkäç Sez inde Samar şähär Dumasın qızıllar basqan dip uylıy kürmägez. Bu yulı bol'şevik- küpçelek mäğnäsendä, ä ul küpçelek biznes wäkilläre häm alarnı eşçe, ğadi xalıqqa oligarxlar dip kiterep quyalar. Şähär dumasında revolyutsion situatsiä şähär ustavın üzgärtergä tırışu belän bäylängän. Ägär elek Samar türäsen xalıq saylap quyğan bulsa, biznes tarmağınnan kütärelgän deputatlar şähär merın deputatlar arasınnan saylap quyu yulın alğa sörep kildelär.

Bügenge mer Limanski häm anıñ komandası, älbättä inde, mernı xalıq saylap quyu yağında. Menä şul ideyäne tormışqa aşıru niätennän şähär buylap imzalar cıyu oyıştırğannar, xalıq cıyınnarı uzdırıla. Çirattağı cıyın maynıñ 17- dä Litvinov isemendäge mädäniät Sarayında uzdı, zal da xalıq belän şığrım tulı ide, mädäniät Sarayı qarşındağı mäydan da xalıq belän şıplap tutırılğan ide. Plakatlarnıñ eçtälege ber buldı- mernı xalıq saylap quyarğa tieş!

Läkin suqır küzgä dä taşlana torğan ber närsäne kürsätmi mömkin tügel. Saflar lineyka belän sızğanday, çönki kolonnalar rayonnar bastırılğan ide. Tamaşaçınıñ da kiem- salımı, tös- başı,üz- üzen totışı ber stil'dä. Yä alar bügenge çinovnik strukturalarındağı xezmätkärlär, yä şunda eşläp pensiägä kitüçelär, mäğärif, meditsina uçrejdenielärendä xezmät itüçelär.

Meñgä yaqın keşe utırğan mädäniät Sarayı säxnäsennän 12 keşe çığış yasadı. Alar- yäşlär wäkilläre, däräcäle pensionerlar, milli oyışma äğzaları, deputatlar, kommunistlar. Ber säğätkä suzılğan çığışlardan qayber fikerlär:

“ Bez mernı turıdan- turı saylaw yağında”; “Bezneñ xoquqlarnı almağız”; “Oligarxlar niäten tormışqa aşırmabız”; “Näfrätlänü xoquqın qaldırığız”; “Rusiädä xalıq barlığın onıtmağız”.

Şul uq waqıtta bu ustavnıñ da “yomşaq” urınnarın kürsätep uzdılar. Döres, Samar şähär ustavın tikşerü, tözätü, tözekländerü niätennän cıyılğan cıyın waqıt- waqıt Rusiä kiñlegendäge afätkä barıp totaştı. Guberna duma deputatı Svetlana Quz'mina barlıq kommunistlar isemennän söyläp, bügenge xakimiätneñ tötmäsen tetep, söyäklären yudı. Bu waqıtta zaldağılar şähär ustavın onıtıp torıp bügenge Putin säyäsätendäge kimçeleklärgä näfrätlänep qul çaptılar.

Äye, Samar şähär ustavınıñ xalıq modele oligarxlarnıqınnan ayırıla. Mäydanda tatarlar da basıp tordı. Olı, tormış täcribäle ağaylarnıñ fikerläre tübändäge ide:

“Ägär gubernatorlarnı bilgeläw başlanğaç şundıy näfrät mitingları uzsa, bu çınnan da xalıqnıñ demokratik yulnı yaqlawı itep qabul iteler ide. Bügenge mitingnı şähär çinovnikları oyıştıruı küzgä taşlana.

Mernı da bit böten xalıq saylamıy. Saylawçılarnıñ 25%-ı saylawğa kilä häm alar 3-4-kä bülenälär. Şulay bulğaç, niçek inde Samar türäsen böten xalıq saylıy dip äytep bula “,- didelär aq saqallar.

Şamil Bahautdin, Samar

XS
SM
MD
LG