Accessibility links

дүшәмбе, 5 декабрь 2016, Казан вакыты 11:40

Säyäsätçelär, cirle xakimiät häm rus estrada yoldızları arasında futbol matçı uzdı


27 may – şimbä könne Qazanda "İgelek bayrağı" xäyriä aksiyä qısalarında säyäsätçelär, cirle xakimiät häm rus estrada yoldızları arasında futbol matçı ütte. Berençe tapqır "İgelek bayrağı astında" xäyriä telemarafonı 2005 yılnıñ 12 iyündä Mäskäwdäge "Lokomotiv" stadionında uzğan ide. Bıyıl isä Bötenrusiyä xäyriä aksiyäseneñ marşrutı Qazanda başlandı. Rusiä Däwlät Dumasııñ iqtisadi säyäsät komitetı räise Valeri Draganov süzlärenä qarağanda, bu yuqqa ğına tügel. “Tatarstan reformalarnıñ räsmi bulmağan äydäp baruçısı, sotsial'-iqtisadi reformalarnıñ yaqınça 80 protsentı Tatarstanda başlanğıç ala. Biredä citäkçelek tä tar mäğnädäge xakimiät tügel, ä cämäğätçelek öleşe itep qabul itelä",- di. Cirle xakimiät häm estrada yoldızları arasında futbol matçı yañğır yawıp toruğa qaramastan Qazannıñ "Xezmät rezervları" stadionında uzdı. Bu könne stadion tamaşaçılar şığrım tulı ide. Şunı äytergä kiräk, monıñ qädär keşeneñ älege stadionğa, uzğan yılnıñ tuplı xokkey buyınça dönya çempionatınnan birle kilgäne bulmağan.

Futbol uyını 4:2 isäbe belän Tatarstan xakimiäte ciñüe belän tämamlandı. Futbol qırında Tatarstan xakimiät komandası öçen Qazan merı İlsur Metşin, “Rubin"nıñ baş trenerı Qorban Berdıyev, futbolçı Sergey Xarlamov uynasa, qapqada Premyer ministr urınbasarı - Transport häm yul xucalığı ministrı Vladimir Şvetsov tordı. Qarşı yaq qapqasına öç tupnı İlsur Metşin, ä dürtençesen Sergey Xarlamv kertte.

Ä Rusiä estrada häm säyäsätçelär komandasında figuralı şuu yoldızı İl'ya Averbux, Däwlät Duması deputatları häm estrada yoldızları - Sergey Minaev, Avraam Russo, İrakliy, P'yer Narsiss, Aleksandr İvanov, Niqolay Trubaçnı yañğır da qurqıtmadı.

Matçta cäräxät aluçılar da buldı. Äytik, uyınnıñ berençe minutlarında uq cırçı İrakliynı ayaq cäräxäte belän xastaxanägä alıp kittelär. Uyın däwamında, 0978 telefonına şaltıratıp, balalarğa qıybatlı operatsiä yasatuğa yärdäm itärgä mömkin ide. Uyın tämamlanuğa, awıru balalarnıñ äti-änilärenä häm tabiplarğa öç million sumlıq sertifikatlar tapşırıldı. Soñınnan iptäşlärçä oçraşu Mäskäw artistları qatnaşlığında konsert belän tämamlandı.

Gölnaz Şäyxetdin

XS
SM
MD
LG