Accessibility links

сишәмбе, 6 декабрь 2016, Казан вакыты 11:19

Terkäw üzägeneñ yaña binası bulaçaq


Tatarstanda cir, küçemsez milekne terkäw mäs’äläse soñğı yıllarda küplärneñ üzägenä ütkän närsä buldı. Bu bay, berniçä fatir, yort, yazlıqqa iä keşelärgä genä qağıla torğan mäs’älä tügel. Älege oçraqta baylar da, ğömer buyı cıyğan aqçağa, burıçqa kerep ber bülmäle, keçkenä genä fatir aluçı yäki satuçılarnı da bertigez nujara. Nik disäñ, här milekne terkäw respublikada barı ber genä urında – Terkäw palatasında ğına bara. Ä mondıy satu, alu eşläre xäzer bik küp respublikada. Citmäsä, terkäw öçen qäğäzlär cıyası da az tügel. Läkin äle bar dokumentlarnı cıyıp, Terkäw palatasına kilsäñ dä, üz milkeñä tieşle qäğäzne tiz genä alıp qaytıp bulmıy – monda aldan dokumentlarnı birergä çirat, annarı, şaqtıy ğına waqıt ütkäç, kilep alğanda da kerdeñ dä aldıñ tügel. Östäwenä, tege yäki bu dokumentığız yuq yäisä döres eşlänelmägän dip yış qına kire dä qaytarıp cibärälär. Terkäwçelär isä, älege xälne eşlärgä keşe citmäw, alar urnaşqan binada urın az, xezmätkärlärgä qısan buluı belän añlattılar. Terkäw palatası Qazannıñ iñ üzägendä urnaşqan. Palatağa kilüçe keşelär öçen bulğan bu uñaylıq, yul xäräkäte öçen şaqtıy zur problemağa äylände. Palata urnaşqan bina yanında maşinalar quyu urını az bulu säbäple, üz milken terkärgä dip maşinada kilüçelär bolay da zur xäräkätle Yerşov uramın öleşçä yabıp quyıp, anda zur-zur bökelärgä säbäpçe bulalar.

Läkin tizdän qayber şuşındıy uñaysızlıqlar betärgä tieş. Tatarstannıñ Terkäw palatasın şähärneñ Boriskovo bistäsendä urnaşqan Teplokontrol’ zavodınıñ ber qullanılmıy torğan binasına küçerergä tieşlär. Monda, şulay uq, terkälü eşendä kiräkle bulğan salım xezmäte, bank bülekçäläre dä bulır, dip kötelä. Yaña binada maşinalarğa da, keşelärgä dä urın irkenräk bulaçaq. Xäzerge köndä monda tözekländerü eşläre bara. Uzğan şimbädä anda Mintimer Şäymiev tä bulıp qayttı. Ul terkäw xezmätläre citäkçeläre belän bergä tözekländerü eşläreneñ barışı belän tanışıp yörde.

Şäymiev respublikada terkäw palatasınıñ eşçänlege belän inde küptännän qızıqsına. Üzeneñ Däwlät Şurası deputatlarına yullağan çirattağı yullamasında ul şuşı xaqta da äytte häm bik citdi räweştä şuşı citeşsezlekne tözätergä quştı. Şuña da, Terkäw palatasınıñ yaña binalarında eş bik qızu bara. Elek terkäw palatası 1700 kvadrat metr cirdä urnaşqan bulsa, xäzer alarğa 15 meñgä yaqın kvadrat metr cir bireläçäk. Monda küçengäç, terkäw xezmätlärenä östämä belgeçlär dä eşkä alınaçaq ikän, eşlärne tögälräk itep alıp baru öçen yaña kompyuterlar da östäläçäk. Eşlär buyınça monda kilgän xalıqqa, üz çiratın yaxşı şartlarda kötärgä mömkinlek tä tudırırğa quştı prezident.

Şäymievnıñ, berençe terkäwgä älege binağa qayçan kilergä mömkin bulaçaq, digän sorawına, federal’ terkäw xezmäteneñ tatarstan buyınça baş idäräse citäkçese Lyudmila Kuz’mina, binanı tözekländerü eşlären avgust urtalarına tämamlarğa uylanuı turında äytte. Xalıq kötä, tizräk eşlärne caylaw yağın qarağız, dide prezident terkäw xezmätläre citäkçelärenä.

Gölnaz İlgizär

XS
SM
MD
LG