Accessibility links

шимбә, 10 декабрь 2016, Казан вакыты 19:38

Tömänneñ “Çişmä” ansamble Qazannan uñış belän qayttı


“Çişmä”ne ansambl' dip äytep tä beterü mömkin tügel. İke keşe alar. Tömän rayonınıñ Şıqça awılında toruçı Ğayaz Ğabdullin häm Borovoy awılınnan Äbüzär Miñlebaev. Ğayaz bayanda uynıy. Ä menä Äbüzär säxnägä alıp çıqqan xalıq uyın qoralları 10 artıq keşelek ansambl'gä citärlek. Äbüzärne Tömän yaqlarında “çelovek orkestr” dip tä yörtälär.

May urtasında Qazanda orkestrlar häm xalıq uyın qorallarında uynawçı ansambl'lärneñ böten Rusiä külämendä festival'-bäygese uzdı. Bu bäygeneñ ikençe turı ide. Ostalıqnı Qazanğa uq barıp kürsätü öçen başta yegetlär üzläreneñ videotasmaların 1 turğa cibärep imtixan tottılar. Mädäniät häm kinematografiä federal' agentlığı, Rusiäneñ däwlät xalıq icatı yortı xalıq uyın qorallarında uynawçı ansambl'lärne häm orkestrlarnı barlaw öçen ilne 3 kisäkkä bülgän. Berençe kisäktägelär aprel' ayında Rostov na Donu şähärenä cıyılğannar. İkençe kisäkkä kergännärne Qazan qabul itte. Öçençe öleş uyınçıları oktäber ayında Ulan-Udeğa baraçaqlar. Qazan festival'-bäygesen Mäskäw belän berlektä Tatarstannıñ mädäniät ministrlığı häm xalıq icatı, mädäni-ağartu eşe fänni-metodik üzäge dä oyıştırğan. Sankt-Peterburg däwlät konservatoriäseneñ xalıq uyın qoralları fakul'tetı dekanı Anatoliy Tixonov räislek itkän jyuri Tömänneñ “Çişmä” duetına 3 däräcädäge lawreatlar diplomı tapşırdı.

Orkestrlar häm xalıq uyın qorallarında uynawçı ansambl'lärneñ böten Rusiä külämendä festival'-bäygeseneñ 3 turı häm Gala konsert Mäskäwdä 2007 yılda uzaçaq. Qazanda lawreat diplomı belän büläklängänlektän bu çarağa Tömännän Äbüzär Miñlebaev belän Ğayaz Ğabdullin da barırğa cıyına. “Añarçı şomartası momentlar küp äle”,- di Äbüzär Miñlebaev.

Nail Alan, Tömän

XS
SM
MD
LG