Accessibility links

Кайнар хәбәр

Qazan İslam İnstitutı oyıştı


Rusiä islam universitetı 1998 yılda oyışqannan birle , anı Tatarstannıñ xäzerge möftie Ğosman İsxaqi citäkläde. Ä universitetnı oyıştıruçılar, Rusiä möftiläre şurası, Tatarstan diniä näzaräte häm ber däwläti oyışma- Tatarstan Fännär akademiäseneñ Tarix institutı ide. Universitet baştan uq, yuğarı belemle din belgeçlären äzerläwne maqsat itep quysa da, citäkçelek yıl sayın mullalar ğına çığara tordı, aları da yıl sayın distädän artmadı. Respublika soñğı yıllarda İslam mirasına iğtibarnı däwlät däräcäsendä birä başladı. Tatarlarnıñ cäditçelek mirası- Tatarstannı bügenge köndä dä dönyada tanıta alaçaqlığın istä totıp, şuşı mirasnı universitet däräcäsendä kütärü, öyrätüne räsmilär cayğa salır öçen, RİUdağı citäkçelekne alıştırdılar. Döresräge, citäkçelek yaña bulsın öçen, universitetnıñ öç oyıştıruçısı da riza buldı. Tarix institutınıñ bülek mödire, tarix fännäre kandidatı İldus Zahidullin Rusiä islam universitetına rektor itep quyıldı. Ä uqu yortı isä üze dönyawi din belgeçläre äzerli torğanğa äylänä dip belderelde.

Tatarstan Diniä näzaräte, başta riza bulsa da, soñraq, dönyawi uqu yortı buluına qarşı çıqtı. Diniä näzarätenä yaqın bulğan törkemnär, elekkege rektor, Tatarstan möftie Ğosman İsxaqi tuğannarı törle qarşılıq çaraları uzdırdı. Mäs’älä könnän –kön quyıra tordı. RİUnıñ yaña citäkçelege bu mäsälne xäl itär öçen, universitetnı dönyawi itep qaldırırğa, ä mullalar äzerlär öçen yaña uqu yortı buldırırğa xäl qıldı. Yañası isä Qazan islam institutı dip atalaçaq dip belderdelär. İnde menä, bu könnärdä, Mäskäwdä bu uqu yortın ğämälgä quyu buyınça cıyılış uzdı. İnde, Azatlıqta aldaraq Ğosman İsxaqi bu xaqta belderde. RİUdan ayırmalı bularaq, yaña institutnı Rusiä möftiläre Şurası belän Tatarstan diniä näzaräte genä ğämälgä quydı. RİU rektorı isä, telägän şäkertlär ike uqu yortında da uqıy ala dip beldergän ide. Şulay uq, yaña uqu yortı RİU bazasında urnaşaçaq dielgän ide elegräk. İnde, institutnıñ rektorı bulğan Ruslan Tahirov RİUğa barıp, andağı şäkertlärne Qazan islam universitetına küçärgä ügetläp tä yörgän ikän. Ä Tatarstan möftie urınbasarı Wäliulla Yaqup äle rektor bilgelänmäde, uqu yortı oyışmadı dip tä belderde. Anıñça, uqu yortı terkälü uzğaç qına oyışqan sanala.

Qazandağı İslam uqu yortı tiräsendä wäzğıät, barıber, RİUnıñ yaña citäkçelege telägänçä ğämälgä aşırıla. Ortodoks İslam tarafdarı Ğosman İsxaqi isä, barıber, üz süzendä qala birä. Menä şundıyraq wäzğıät.

Räfis Cämdixan

XS
SM
MD
LG