Accessibility links

шимбә, 10 декабрь 2016, Казан вакыты 23:35

Qazanda keçe eşmäkärlär belän köräş bara


Qazan uramnarında 1400 dän artıq keçkenä kibet-kiosklar bar. Qazan merı İlsur Metşin şularnıñ 400-en sütergä kiräk dip bara. Eş şunda ki, alar tikşerülär uzğannan soñ, sanitar taläplärgä turı kilmi dip taptılar. Qaysısında su yuq ikän, qaysısında pıçraq su tügärgä urın. Äy, ezlägän etkä söyäk tabılğanday, tikşerüçelärgä dä säbäp çığa tora inde ul. Ğäcäbe şul, bötenesen bulmasa da, sütelergä tieşle kibetlärneñ küpçelege şähär üzägenä turı kilä. 400 kibettä meñärlägän keşe eşli. Alar qaya bara. Eşsez uramda qaluı bar. Qazanda kemdä kemne eş urını bar, kil dip kötep tormıy. Eşsezlär çiratına tağın keşelär kiläçäk. Bu sütelergä tieşle kibet xucaları uzğan atnada respublika parlamentı qarşına piketqa da çıqtılar. Barısı da tügel, 100 dän arıqlap keşe. Alar, Şäymievtan yaqlaw soradılar. Şäymiev isä, kibetçelärne tügel, ä Qazan merı Metşinnı yaqlap çıqtı. Älbättä, üzençä. Salmaq häm mantıyqlı. Şähärne maturaytırğa kiräk. Menä cawap şundıyraq buldı. Läkin, mäs’älä monıñ belän genä betmäde. İlsur Metşin, älege baş kütärüçelär belän tağın ber qat oçraştı. Räsmi mäğlümat çaraları, mäs’älä şuşı cıyılışta xäl itelde dip belderdelär. Däwlät mäğlümat çaraları tasvirlağança, eş alay tiz xäl itelmäde. Metşin, 400 läp kibetne barıber alırğa turı kiläçäk dide. Ä xucalarnı eşsez dä qaldırıp bulmıy bit. Alar bit, normal cämğiättä urta sıynıf dip atalğan, cämğiätneñ totrıyklıylıygn täşkil itkän keşelär. Häm niçek bette disägez, Metşin, alarğa, yaña tözelä torğan yotrlarnıñ berençe qatlarında kibetlären açırğa täqdim itte. Ä eşmäkärlär, bezneñ ul qadär aqça yuq, äle meñ yıllıq aldınnan alğan kreditlarnı da tüläp beteräse bar dip belderdelär. Metşin, öleşçä yärdäm itäbez dip belderde. Älege cıyılışta, tağın ber täqdim buldı kibet xucalarına. Kiosklarığıznı küçeräsez. Qaya disägez, dürtär qatlı itep tözelgän säwdä üzäklärenä. Şöker, alar Qazanda soñğı yıllarda yañğırdan soñ çıqqan gömbälär kebek, kübäyep kittelär. Häm buş toralar. İmändä ikän çikläwek. Menä , didelär, kibet xucaları. 400 kibetne yabu artında, säwdä üzäklären tutıru tora. Monnan tış, här yort yanında diärlek kiosk torğanda, säwdä üzäklärenä keşe dä tieşençä yörmi. Kiosklarnı yabu artında ike quyan qoyrığın totarğa tırışu yata. Buş torğan säwdä üzäklärendä, kibetçelär urınnı arendağa alıp, tutıralar. İkençese, yaqında ğına kibet bulmağaç, xalıq ta şunda yöri başlıy. Monnan tış, uramnar da çistarına. Monıñ belän dä kibet xucaları riza tügel. İnde xäzer, uptım-ilahi kiosklarnı yabıp bulmağaç, alarnı ayırım –ayırım yaba başladılar. Tağın tikşerülär kitte. Qazandağı başqarma komitet räise urınbasarı Ayrat Nuretdinov, üze tikşerep yöri kibetlärne. Şul uq keşe, säwdägärlär belän xakimiät arasında söyläşülär dä alıp bara. Şulay itep, barıber, Qazan uramnarındağı küp kenä kiosklar yuqqa çığaçaq. Ä xalıq gipermarket ta, torgovıy sentrlarıya yöriäçäk. Rusiädä türälär tiz genä bireşmi şul. Alarnıñ üz süzläre qatı. Ällä mänfäğätläre şunda.

Räfis Cämdixan.

XS
SM
MD
LG