Accessibility links

шимбә, 3 декабрь 2016, Казан вакыты 05:32

Tämäkene niçek taşlarğa?


Tämäke tartunı taşlarğa teläwçelär iğtibarına! 31 may - dönyada tämäkegä qarşı köräş köne. Azatlıq radiosı xäbärçese Kathleen Moore Pragadağı ber klinikada tämäkene taşlarğa tırışqan keşelär yanında bulıp qayttı.

Praga çitendäge keçkenä klinika, zamança cihazğa totaştırılğan ber yäş keşe, monnan soñ tämäkesen nixäyät taşlıy alaçağına ömetlänä. Anıñ başına tasma bäylängän, sul qulında çıbıq, çıbıq "biorezonans" cihazına totaştırılğan:

"-Cihaznıñ ekranına qarasaq, xäzer menä ul dulqınnı yazdıra. Xäzergä sez ber ni dä sizmisez, ämma kötik. ....... signal bik keçkenä, ämma ayırma bar. -eye min anı sizäm."

Tabip Jan Rychnovsky bu cihazda keşe tänendä nikotinnıñ niçek eşlägänen kürsätä. Nikotin elektromagnit signal cibärep keşene xälsezländerä. Älege cihaznı qullanuçılarnıñ 80%tı tämäkene taşlıy ala dip isäplänä. Häm biregä kilgän, könenä 30 tämäke tartqan Prokop isemle yeget tä ömeten özmi:

"5 yıl yarım tartam, şul waqıt eçendä 4 tapqır taşlap qaradım, buldıra almadım. Bu klinika turında duslardan beldem, annarı internetta uqıdım da – barıp qarıym äle dip uyladım."

Nikotinnıñ keşegä ziyanın cihaz ekranında kürü – tartunı taşlaw yullarınıñ berse. Tağın hipnoz, inä qadaw, ülän isnäw bula ala. Häm älbättä tämäke tartuçınıñ üz ixtiyarı. Qaysısı yaxşıraq? Çexiäneñ Tämäkegä qarşı Koalisiäse başlığı Katerina Langrova:

"Tartunı taşlar öçen ciñel genä ber yul da yuq, sezgä ciñel dip äytälär ikän – dimäk alar sezgä yardäm itergä cıyınmıy."

Böten çaralar – ägär dä alarğa ışansañ, tınıçlandıra ğına, ämma däwalamıy. İñ yaxşısı – tämäke tartunı taşlaw könen bilgeläw, di Langrova:

"İñ berençe, keşegä tartuın taşlağançı, tartqan waqıtları, tämäkesen taşlasa – tirä yağında närsä üzgäräçäge turında uylarğa kiñäş iter idem. Şulay uq tartunı kisäk taşlarğa kiñäş itäm, berär könne inde tämäke tartmawçı bulıp uyanırğa. Älbättä törle keşelär bula, qayberäwlär tämäke sanın kimetä kimetä taşlıy. Ämma ul çaqta keşe kiräk qädär dä tartmıy, bötenläy taşlamıy da, häm bu awır xäl ozaqqa suzılırğa mömökin. Şuña kürä bez anı kiñäş itmibez."

Langrova häm anıñ oyışması tämäke tartunı taşlarğa teläwçelärneñ ğailäläre häm duslarına da möräcäğät itä. Tartunı taşlaw öçen tirä yaqta sälämät aktiv tormış alıp baruçılarnıñ buluı möhim. Häm älbättä ruxi yardäm bik kiräk, bigräk tä berniçä tapqır tırışıp ta tämäkene qullarına kire aluçılarğa. Pragadağı medetsina üzäge bu tör yardämne dä täqdim itä. Äle ay başında ğına könenä 25şär tämäke tartqan keşe:

"Basqıçtan mengändä yäki sport belän şöğellängändä, tramvayğa yögergändä sulışım betä başladı, bolar mine borçıy başladı. Şulay uq teşlärneñ sarğayuı, sarı barmaqlar, kiemnän sası is kilüe. Berençe könnär bik awır buldı. Gel tämäke qabızasım kilde, tirläp peştem, käyefem naçar buldı, keşelärgä taşlandım. Xäzer inde menä öçençe tapqır kildem, biredä barısın da añlatıp birälär, soñınnan inde tämäkene taşlağaç ta kontroldä totalar. Bu üzäkkä kilmägän bulsam tämäkene taşlaw bik awır bulır ide."

Üzäk başlığı Langrova süzlärenä qarağanda, bik az keşe berençe tapqırdan tämäkene taşlıy ala. Ämma här omtılış näticäleräk bula bara.

Alsu Qormaş
XS
SM
MD
LG