Accessibility links

дүшәмбе, 5 декабрь 2016, Казан вакыты 21:46

Omskida mädäni çaralar


Omski ölkäseneñ mädäniät ministrlığı programması buyınça may ayında ütkärelergä tieşle tatar mädäniäte könnäre sentäbergä küçerelde. Añlaşıla ki, anıñ qısalarında niätlängän çaralar da üzennän üze közgä qädär kiçekterelde. İnde xäbär itkänebezçä, mädäniät könnäre öçen töp cawaplılıq milli oyışmalar belän eşläwçe “Duslıq yortına” yöklängän. Döres, tatar oyışmaları da çittä tügel, barlıq çaralar da alar köçe belän ütkärelä. Mädäniät könnäre kiçekterelsä dä, anıñ qısalarında bulğan çaralarnıñ qayberlären tatar oyışmaları üzlektän ütkärä başladılar. Şundıy ber çaranı şähär milli mädäni möxtariäte häm “Umırzaya” ansamble xäwäskärläre “Ömet” törkemendä şöğellänüçe balalar belän ütkärdelär. Alar Gabdulla Tuqaynıñ 120 häm Musa Cälilneñ 100 yıllığına bağışlanğan ädäbi muzıkal' kiçä oyıştırdılar. Anda balalarnı şağirlärneñ tormış häm icat yulları belän tanıştırdılar, şiğerlären uqıdılar, alar süzlärenä yazılğan cırlar cırladılar. Balalar da kiçädä tıñlap utıruçı ğına bulmadılar, üzläre dä şiğerlär uqıdılar, cırlar başqardılar. Axırda oyıştıruçılar balalarğa “Yenisey korporatsiäse” citäkçese Tamir Alimbaev isemennän tıynaq büläklär dä tapşırdılar.

Tatar mädäniäte könnäre qısalarında “Yaña yoldız” dip isemlängän balalar cır bäygese Tara şähärendä ütkärelergä tieş ide. Bu bäygegä ölkädä eşläwçe küp kenä balalar kollektivları äzerlände. Şul isäptän Tara şähärendä tatar mädäniät üzäge qarşında şöğellänüçe “Yaqtaş” klubı balaları da küp kenä yaña cırlar öyrängän idelär. Bu cırlar belän balalar uzğan yal könnärendä Tara şähärendä häm Kolosovqa rayon üzägendä bulıp uzğan “Nur “ ansamble konsertlarında çığış yasadılar. “Nur” ansamble konsertlarnı üzeneñ oyışuına ike yıl tulu uñayınnan ütkärde. Bu waqıt eçendä şaqtıy ostarğan Tara üzeşçännäreneñ konsertın tamaşaçı cılı qarşıladı. Balalar çığışı konsertqa üzenä kürä ayırım ber cılılıq ta östäp cibärde. Şunsı da kürkäm buldı, balalar başqaruında yañğırağan “Tuğan tel” cırına zalda utırğan hämmä keşe quşıldı. Äytergä kiräk, Omskinıñ awıl-rayonnarında tamaşaçılar quşılıp cırlaw äle yaña ğına ğädätkä kerep kilä. Biredä “Nur” ansamble sänğät'kärle tamaşaçını aktivlaştıru maqsatı belän, konsert aldınnan cırnıñ süzlären xalıqqa taratıp çıqqan idelär. Awıllarda tağın ber kürkäm ğädät ğämälgä kerep kilä, konserttan soñ oyıştıruçılar häm çığış yasawçılar çäy östäle artında aralaşalar, fiker alışalar, urtaq eş plannarın bilgelilär. Bu yulı da Tara sänğat'kärläre Kolosovqa rayon üzägendä eşläwçe “Mäxäbbät” ansamblen iyün ayında Tara rayonınıñ İşäy awılında ütkäreläçäk Sabantuy bäyrämendä häm avgust ayında rayon üzägendä bulaçaq milli-mädäniätlär yortın açu tantanasında qatnaşırğa çaqırıp kittelär.

Saniä Mirxaleeva, Omski

XS
SM
MD
LG