Mäktäplärdä uqu yılı tämamlandı. Menä şul ber yıl eçendä törle- törle mädäni çaralar uzdırıla. Bolarnı sanap beterü dä mömkin tügel. Şulay da iğtibar belän küzätsäñ, standart çaralar qısalarğa kermägännäre dä bar ikän. Samarnıñ üzendä tatar balalarınnan ğına tuplanğan “Yaqtılıq” isemle mäktäp eşläp kilä. Mäktäp direktorı- Xaridä Daşkina.
Xaridä xanım, 226 uquçısı bulğan “Yaqtılıq”ta uzıp bara torğan uqu yılında qaysı çaranı balalar öçen “der selketüçe” çara dip sanar idegez?
Şundıy çara dip min mäktäptä bal iyüllär kollektivı tuplawnı sanıym. Maynıñ 18- dä biüçelär konkursı uzdırdıq. Bäygene öç törkemgä bülep oyıştırdıq. Başlanğıç sıynıflar, urta häm ölkän sıynıflar. Balalar ğına tügel, ata- analar da bik qänäğät qaldılar. Xäzer biü törkeme biü zalına sıymıy başladılar.
Bal'nıy tanes zäwıqlı kiem taläp itä. Bu çığımnarnı üz öslärenä ata- analar aldılarmı?
Qızğanıç ki, älegä üzebezneñ kostümnarıbız yuq. Biü tügäräge citäkçese Svetlana xanım Nazarova Litvinov mädäniät Sarayı kostyumnarın birep tora. Şulay da barlıq balalar da ayaq kiemnären üz aqçalarına aldılar. Yaña yünäleş balalarğa da, ata- analarğa da bik oxşıy.
Barlığı niçä bala qatnaştı inde biü tügärägendä?
Bügenge köndä qırıqtan artıq bala qatnaştı. Bu inde mäktäptä här bişençe bala bii digän süz.
Üzenä kürä “Yaqtılıq”qa reklama inde. Balalar därräw qubıp yörilär disez bit.
Äye, Dilärä Xäsänova belän Rinat Xösnetdinovnıñ iyülläre soqlanırlıq. Öslärenä qarap tuymaslıq. Ğömerlärendä berençe märtäbä bii başlağan balalar soqlanırlıq xäräkät yasıylar. Menä Nail Cabbarov berençe urınnı aldı. Balalar qanatlandılar, çäçäk tacıday açıla başladılar. Alarnıñ yöreşläre üzgärde. Bökräyep utırğan malaylar tanımaslıqqa äyländelär. Balalarnıñ başları kütärelde, yöreşläre başqa xäzer. Zıyalı täkäbberlek elementları kerde üzlärenä. Bii başlağaç Nail Mostafinnıñ uquı yaxşırdı, cawap birüläre maturaydı. Mäktäptä bal'nıy tanes tügärägennän tış tatar biü tügäräge dä eşli. İkesenä dä balalar teläp yörilär. Şähär küläm festival'lärdä qatnaşalar. Diplomant isemen aldılar. Samar şähär administratsiäse 10 biüçe balağa İdel buylap säyäxätkä yullama büläk ittelär. Balalar teploxodta ber atna yal itäçäklär.
Ä menä festival'lärdän tış, şähär küläm zur bäyrämnärgä çaqırmıylarmı balalarnı?
Çaqıralar. Ciñü könenä bağışlanğan zur tamaşada qatnaştılar.
Şamil Bahautdin, Samar
