Accessibility links

якшәмбе, 11 декабрь 2016, Казан вакыты 05:06

İğtibar üzägendäge ike mäxkämä utırışı uzdı


Respublikada bu aralarda zur yañğıraşlı, küplärneñ iğtibarın cälep itkän mäxkämä eşläre tämamlandı. Respublikadağı Tatmedia agentlığı citäkçese Marat Moratovnıñ bäysez dip sanalğan Zvezda Povolj’ya gäcitenä däğwası turında bez sezgä inde söylägän idek. İsegezgä töşerep kitäbez, uzğan yazda Marat Moratov Qazan Dumasına saylanğan ide. Şul waqıtta, Zvezda Povolj’ya gäcitendä, saylaw aldı köräşen alıp barğanda, älege nämzät saylaw qanunnarın bozdı, dip yazıp çıqtı. Monıñ belän kileşmiçä, basmanı yalğanda ğäyepläp, Moratov gäcitne mäxkämägä birde. Ul mäxkämädän üze kürgän moral’ zıyan bärabärenä gäcittän 100 meñ sum tülätüne taläp itte. Şuşı däğwälar tikşerelgän arada Zvezda Povolj’yanı yaqlap Tatar ictimaği üzäge ike piket oyıştırdı. Alay ğına da tügel, ictimaği üzäk wäkilläre Marat Moratovnı wazifasınnan azat itüne dä taläp ittelär.

Gäcit mäğlümätlärenä qarağanda, üzäk wäkilläre 2 yün könne dä tağın ber piket ütkärergä niätlilär ikän. Bu yulı alar gäcitne respublikanıñ Jurnalistlar berlege yanında yaqlayaçaq. Mäxkämä eşenä qaytsaq, soñğı utırış 30 may könne uzdı. Anda Morat Moratovnıñ wäkile – ä Tatmedianıñ general’ direktorı mäxkämägä üze kilmägän ide, häm Zvezda Povolj’yanıñ baş möxärrire Räşit Äxmätovnı tıñlap, xäkimnär Moratovnıñ däğwäsın öleşçä qänäğätländerü turında qarar qabul itkännär. Mäxkämä qararı nigezendä gäcit Tatmedia citäkçesenä 5 meñ rubl’ tülärgä tieş.

Tatarstanda iğtibar üzägendä torğan tağın ber mäxkämä eşe kriminal’, cinayätçelär belän bäyle. Süz Çallıdağı 29 kompleks dip atalğan cinayätçel törkem turında bara. Älege cinayät eşe qısalarında 33 keşegä gäyepläwlär belderelgän. 29 kompleks törkeme tarixın da isegezgä töşerep ütik. Törkemneñ wäkillären Çallıda ğına tügel, respublika buylap, xätta Mäskäwdä dä qılınğan 20 dän artıq üterüdä, talaw, qanunsız qoral yörtü häm başqa cinayätlärdä ğäyeplilär. Eçke eşlär ministrlığı mäğlümätlärenä qarağanda, alar xisabında Minzälädän Räfis Loqmanov häm anıñ belän bulğan tağı 7 keşene, Alabuğa şähär şurası deputatı Aydar İsrafilovnı üterü, küp kenä iqtisadi cinayätlär bar. Alar berniçä şaqtıy zur şirkät häm banklarnı kontrol’ itkännär. Adığan Säläxov citäklägän törkemgä 500 tiräse keşe kergän, dip isäplilär tikşerüçelär.

Berençe bulıp 29 kompleks äğzälärenä İsrafilovnıñ üterelüen tikşergändä çıqqannar. Tikşerüçelär deputatnı üterüçene qulğa alalar häm anıñ aşa törkemneñ başqa äğzälären dä tikşerä başlıylar. Tikşerü eşläre barışında barlığı 33 keşe qulğa alınğan. Alarğa bäyle mäxkämä eşe 2004 yılnıñ 29 noyäberendä başlanıp kitä. Bik ozaq däwam itkän utırışlardan soñ, nihayät, şuşı eşkä dä noqta quyılır waqıt citte. 30 mayda uzğan utırışta cämäğät mäxkämäse qulğa alınğan 33 keşene ğäyeple dip taptı. Läkin ğäyeplänüçelärneñ advokatları älege qarar belän kileşmi, alar aña şikäyät birergä teli. Xäzer ğäyeplänüçelär üzläreneñ cäzaların kötä.

Gölnaz İlgizär

XS
SM
MD
LG