Accessibility links

якшәмбе, 4 декабрь 2016, Казан вакыты 15:20

İran xalıqara täqdimne başta nıqlap tikşerergä teli, Solana Tähranğa cıyına


İran räsmiläre atom programmasına qarağan yaña xalıqara täqdimnärne öyränergä teläk belderde. Yewropa Berlegeneñ tışqı säyäsät citäkçese Javier Solana Tähranğa cıyına.

Şimbä könne İrannıñ Tışqı eşlär ministrı Manuçir Mottaqi "ägär yaxşı niät bulsa" Tährannıñ atom programması tiräsendäge qarşılıqnı xäl itergä mömkin dip belderde.

Atnakiç könne Venada Berläşkän Millätlär İminlek Şurasınıñ 5 daimi äğzası häm Germaniä, ägär İran uran bayıtuın tuqtatsa, aña taşlamalar yasarğa kileşkän ide. Bu şart ütälsä, Quşma Ştatlar da, Yewropa Berlege İran belän alıp barğan söyläşülärgä quşılırğa rizalıq belderde.

Alayda bügen Mottaqi Tährandağı jurnalistlar aldında söyläşülär bernindi şartsız bulırğa tieş dide:

"Töp mäsälä şul – söyläşülär bernindi şartsız, yanawlarsız bulırğa tieş. Täqdimnärgä kilgändä, alar bezneñ qulğa kilep kerep, alarnı tikşergännän soñ, bez fikerebezne iğlan iterbez" di İrannıñ Tışqı eşlär ministrı.

Mottaqinıñ bu süzläre atnakiç könne prezident Mäxmüt Äxmädinecad yasağan belderüdän yomşağraq yañğıradı. Äxmädinecad Könbatış basımına qarap qına bez atom texnologiäsenä iä bulu xoquqınnan waz kiçmäyäçäkbez digän ide.

Comğa könne Washingtonda däwlät departamentı süzçese Tom Casey, Äxmädinecadnıñ bu süzlären bez täqdimgä räsmi cawap dip sanamıybız, digän ide:

"Räsmi cawap alır öçen başta täqdimnärne citkerergä kiräk. Ägär İran xezmättäşlek yulın saylasa, uran bayıtuın tuqtatırğa, yaxşı niät belän söyläşergä qarar itsä, bu xalıqara cämäğätçelek öçen genä tügel, İran, İran xalqı öçen dä yaxşı bulaçaq" di däwlät departamentı süzçese.

Ul arada Yewropa Berlegeneñ tışqı säyäsät citäkçese Javier Solana süzçese Christina Gallah, Solana täqdimnärne citkerü öçen Tähranğa kiçekmästän barırğa äzer dip belderde. Bu söyläşülär tügel, täqdim itü säfäre bulaçaq dide ul.

Säfärneñ waqıtı älegä bilgele tügel. Yäkşämbe 4 yün könne Solana Yaqın könçığışta bulırğa tieş. Düşämbedä İerusalem häm Ramallada anıñ İzrail höm Fälestin citäkçeläre belän oçraşuı qaralğan.

ali ğilmi
XS
SM
MD
LG