Accessibility links

чәршәмбе, 7 декабрь 2016, Казан вакыты 13:49

İstanbulda Tuqaynı iskä aldılar


İstanbulda 2-3 Yün tarixlarında kürenekle şağirebez Ğabdulla Tuqaynıñ tuuınıñ 120 yıl tuluğa bağışlanğan kiçä, artınnan uzdırılğan Sabantuy, süzneñ tulı mäqnäsendä, bik zur uñış buldı.

Monıñ öçen Tatarstan citäkçelegen, anıñ isemennän bu eşlärne İstanbulda alıp barğan Tatarstannıñ Törkiädige wäkalätle wäkilçelegen häm tabiği İstanbulda ber däwlät eşlekleseneñ bulırğa tieşle barlıq sıyfatların üz östendä taşığan, süze dä üze dä matur Premier urınbasarı häm Mädäniät Ministere Zilä Wälievanıñ zur tırışlıqları häm fidakärlekläre buldı. Xalıq sanı 4 million ğına bulsa da, 73 millionlıq ber ildä sänğate, mädäniäte, ädäbiatı häm industriäse belän dä qalışmawın kürsätte. Törkiäneñ dä bu il belän sanaşuwı bälki dä berençe märtäbä bularaq ber ministerneñ Törek Mädäniät häm Turizm Ministere Attila Koçnıñ yolanıñ 2-sendä dä häm 3-ndä dä qatnaşuwı häm Tatarlar turında bik mäğnäle süzlär äytüwe buldı. Ul 2 Yündäge konsert programasınnan soñ Zilä Wälieva xörmätenä birgän kiçke sıy mäclesennän soñ, töne 11:30’ta Ankarağa qaytıp, berse kön säğat irtänge sigezdäge oçqıç belän İstanbulğa kilep, Sabantuyğa qatnaştı. Bu inde Rusiä Federatsiäseneñ ber obyektı bulğan ber ilgä kürsätelgän iñ zur iğtibar dip bäyälärgä mömkin.

120 keşedän torğan Tatarstan delegatsiäse 1 Yündä mäxsus oçqıç belän İstanbulğa kilep töşkäç ük, räsmi delegatsiä, yäğni Wälievadan tış, Böten Dönya Tatar Kongressı räise Rinat Zakirov, Tatarstan Yazuçılar Berlege citäkçese İlfaq İbrahimov, Kazan Utları baş möhärrire Rawil Fäyzullin, Tatarstan Kitap Näşriatı citäkçese Damir Şakirov, Kompozitor Almaz Monasıpov, İstanbuldağı Tatarstan Wäkalätle Wäkilçelege çitäkçese Radik Gimaddinovlar başta İslam Konferensiäse Mädänät häm Tikşerenülär general direktorı Halit Eren belän oçraştılar, kiçen Rusiä Federatsise Böyekilçese Petr Stegny tarafınnan Tışqı Eşlär Ministrı Lavrov xörmätenä birelgän sıy mäclesenä qatnaştılar.

2 Yün comğa kön irtä belän isä Yosıf Aqçura, Ğäyaz İsxaqi häm Sadri Mäqsudilarnıñ ziratlarına barıldı. Topkapı Sarayına vizit yasaldı. Biredä alarnı muzey direktorı ataqlı Prof. İlber Ortaylı qarşı aldı. Kikçe säğat altıda isä Harbiye’dä Cemal Reşit Rey Konsert zalında oyıştırılğan Tuqay räsemnäre kürgäzmäse Ministerlär Koç, Wälieva häm Böyekilçe Stegny tarafınnan açıldı. Ber ük waqıtta Türksoy tarafınnan äzerlängän Tuqaynıñ Törekçägä tärcemä itelgän saylanılğan mäqalä häm şiğerläre cıyılğan kitaplar taratıldı. Şunan soñ 80-90 protsentı tulğan 750 keşelek zalda ministrlar, böyek ilçe, Türksoy çitäkçese, şağirlärebez çığışlar yasadılar. Zilä Wälieva Prezident Şeymievneñ möräcäğäten dä uqıdı, Törkiägä räxmätlären belderde, Prezident Putinı da iskä aldı. Stegny Tuqay belän Puşkinnıñ häykälläre Qazanda berberenä qarap tora, Lemontov häm alar ikese bik yäş çaqta üldelär, läkin ülmäslek äsärlär qaldırdılar dide. Minister Koç isä Tatarlarğa birgän ähämite turında äytep, süzlären Tuqaynıñ “Min Tatarmın, Tatar öçen can atarmın; Min bit üzem dä çın Tatarmın” digän rifmaları belän betergäç zalda köçle alqış quptı. Konsert häm biyülär tamaşacılar öçen çın mäğnädä läzzät sıyı buldı. Orkestr, opera cırçıları berençe sort, dönyanıñ qay öleşendä dä konsert birsälär Tatarstannıñ sıyfatın kütärerlek däräcädä idelär, şulay uq yäş biyüçlär, alarnıñ kiyemnäre zaldağılarnı şaq qatırdı, alqışlar tuqtamadı.

3 Yündä Sabantuy irtä belän säğat unda başlandı. “Tatarstannan sälamnar” lozunğası, Rusiä Federatsiäse, Törkiä, Tatarstan häm Başqortstan bayraqları belän bizälgän säxnädä şulay uq Ministerlar, Böyekilçe, şağirlär hb.larnıñ qotlaw süzläre buldı. Ayırmalıqlı bularaq, Böten Dönya Tatar Kongressı räise Rinat Zakirov Prof. Nadir Däwlätkä Tatar xalqınıñ milli-mädäni üseşenä kertkän xezmätläre öçen Kongressnıñ içtimağıy berläşmäläreneñ xalıqara berlege medalen birde. Biredä dä sänğätkärlärneñ cır biyüläre buldı. Ber kön elekke konsertta kürsätelmägän şahmat uyın ürnäklägän tamaşa bik yaratıldı.

Başta iğlan itelgänçä Başqortstan cır häm biyü ansamble sabantuyğa qatnaşmadı. Alar, Tatarstan säxnäsendä urın almas öçen bulsa kiräk, tönne säğat öçtä Tatarstan wäkilçelege tarafınnan arendağa alınğan sabantuy maydanında ayrım ber säxnä tözergä mataşqannar. Läkin Salawat Yulaynıñ yaw kütärü traditsiäse bu yulı ütmägän. Yarar, tuğannar arasında bula mondıy xällär.

Tatarstan delegatsiäse 4 Yündä aftobus belän 6-7 säğatlek yuldağı Kütahyağa kitä. Şul uq kön, tönne Qazanğa kire qayta.

Qısqası, Tuqaynı iskä alu yolası yuğarı däräcäle häm sıyfatlı buldı. Berençe märtäbä konsertqa qatnaşqan Töreklär Tatarlarnıñ mädäni däräcäseneñ şul xätle yuğarı buluwına şaqqatuları yäşermädelär.

Äxtäm İbrahim, İstanbul

XS
SM
MD
LG