Accessibility links

чәршәмбе, 7 декабрь 2016, Казан вакыты 15:32

Çexiädä ütkän ğömüm saylawlar säyäsi bilgesezlekkä kiterde


Parlamenntağı 200 urınnıñ ber yözen sulçılar, ikençe yözen urta-uñçılar aldı. Xökümät tözü öçen berseneñ dä citärlek tawışı yuq.

Exit-poll sannarına qarağanda oppozitsiädäge Watandaş Demokratlar Partiäse (ODS) 8 yıl xakimiättä torğan Sotsial-Demokratlarnı şaqtıy östenlek belän ciñer dip kötelgän ide. Ämmä, alay bulıp çıqmadı, berse tawışlarnıñ 35, ikençese 32% qazandı. Ä inde bu ike töp köndäşkä quşılırğa äzer torğan keçkenäräk firqälärne dä iskä alğanda, 200 urınlı Çex Parlamentı tip-tigez 2 öleşkä bülende: urta-uñ köçlärneñ dä sulçılarnıñ da 100är urını bulaçaq.

Şuşı sannar bilgele bulğannan soñ Sotsial-Demokratlar citäkçese, premier-ministr Jiri Paroubek ciñelüen tanudan baş tarttı, ODS citäkçese Mirek Topolanek yaña xökümät tözi almayaçaq dide:

"Topolanek äfändeneñ yaña xökümät tözü öçen 101 tawışı yuq, bu fakt. Prezident Klaus ta, Topolanek äfände üze dä monı añlarğa tieş" di Sotsial-Demokratlar citäkçese.

Ul şulay yuq saylaw aldı yarışında aña qarşı qaraltu kampaniäse alıp barıldı dip ul Yuğarı mäxkämägä möräcäğät itü niäten belderde.

ODS partiäse dä, zamanında şul uq partiä wäkile bulğan prezident Vaclav Klaus ta premier ğäyepläwlären kire qaqtı. Klaus düşämbedä ODS başlığı Topolanek belän yaña xökümät mäsäläsendä söyläşülär başlayaçağın belderde:

"Fäqät şunı äytäsem kilä, düşämbedä Prağa sarayına ciñgän partiäne çaqıram. Älegä şul" di Çexiä prezidentı.

Saylaw-aldı kampaniäse barışında salımnarnı kimetü, pensiä reforması, korrupsiägä qarşı köräşü wäğdäläre birgän ODS citäkçese Mirek Topolanek:

"Xäzer bez Xristian-demokratlar häm Yäşellär belän berläşep qararbız. Älbättä bu qayber wäğdälärgä zıyan kiterä ala, läkin bu qurqınış tügel" di ixtimal yaña xäkümät citäkçese.

Ämmä belgeçlär fikerençä, başqa koalitsiälär dä tuarğa mömkin. Sotsial-demokratlar belän kommunistlar, Yäşellärne üzläre yağına awdarıp qarıy ala. Xättä ODS belän Sotsial-demokratlarnıñ zur kolaitsiäse ixtimal di alar.

Läkin, axır çiktä nindi genä xökümät tözelmäsen, bu ilneñ yünäleşen ällä ni üzgärtmäyäçäk di prezident Klausnıñ elekke kiñäşçese, säyäsät belgeçe Jiri Pehe:

"Bu oçraqta optimizm yä pessimizm turında söyläp bulmıy. Saylaw näticäläre ilneñ yünäleşen üzgärtä almıy. Xökümät härwaqıt azmı-küpme urtada baraçaq, tışqı säyäsättä citdi üzgäreşlär, eksperimantlar bulmayaçaq" di säyäsät belgeçe.

İke yıl elek Yewropa Berlegenä quşılğannan soñ bu Çexiädä berençe parlament saylawları buldı.

ali ğilmi
XS
SM
MD
LG