Accessibility links

җомга, 9 декабрь 2016, Казан вакыты 10:45

Fäwziä Bäyrämova: Mäskäw Çeçnä häm Tatarstannıñ bäysezlegen tanırğa tieş


Fäwziä xanım Bäyrämova İttifaq firqäse räise bularaq küptän inde säyäsi belderülär belän çıqqanı yuq ide. Här xäldä mäğlümat çaralarına bu xaqta xäbär itelmäde. İyün ayınıñ berençe könnärendä İttifaq liderı Rusiäne ikele standartlarda, urısçası dvoynıye standartı bula inde, yäğni ike yaqlı uyın alıp baruda ğäyepläp çıqtı.

Eş şunda ki, bu könnärdä, Rusiä tışqı eşläre ministrlığınıñ Mixail Qamınin digän däräcäle ber türäse Gruziädän ayırılırğa telägän, Rusiägä quşılırğa telägän Konyak Osetiäneñ üzbilgelänergä xaqı bar dip belderde. Yäğni, bu ölkä telägänçä, teläsä kemgä quşılırğa, ayırılırğa. İttifaq firqäse şul uñaydan bolay dip belderde

Rusiä tışqı eşlär ministrlığı üzeneñ bu belderüe belän üzbilgelänü aşa däwlät bötenlegen yuqqa çığarunı mömkin xäl dip tanıy. Könyaq Osetiägä bu eştä fatixasın birä. Şul uq waqıtta Rusiä üz sostavında bulğan Çeçnya üzbilgelänergä telägäç, aña qarşı suğış başladı, möstäqillek iğlan itkän Tatarstanğa da törle sanksiälär belän yanadı. Yuğisä Çeçnyanıñ da, Tatarstannıñ da üzbilgelänergä tulı xaqı bar ide.



Möräcäğättä monnan tış, Tatarstannıñ böten xalıqara xoquq normalarğa turı kilep, bäysezlek basqıçların uzıp ta, deklaratsiä, referendum kebeklärne, Rusiä tarafınnan tanılmawı äytelä. Häm, ike törle ülçäw belän eş itä Rusiä di. Yäğni, üzenä kiräk waqıtta xalıqara qanunnarnı tanığan bula, kiräkmägändä, mäsälän Tatarstan oçrağında, tanımıy dip belderä Fäwziä Bäyrämova. Belderüdän sitat

Bu Rusiäneñ üzbilgelänü mäs’äläsendä ike törle ülçäm belän kilüen, yäğni dvoynoy standart belän eş yörtüen kürsätä. Gruziägä basım yasaw öçen ul Abxaziä häm Könyaq Osetiä belän astırtın eş yörtä, alarnıñ xätta üzbilgelänergä xaqları barlığın da tanıy. Moldaviäne aqılğa utırtu öçen Rusiä Prenestrov'ye belän uyın alıp bara. Ukrainanı buysındıru öçen haman Qırım temasın bolğatıp tora. Yuğisä, Qırım urıs cire tügel bit, ul qırım tatarlarınıñ ile, häm anda NATO ğäskärläreneñ kerü-kermäwe mäs’äläse urıs kommunistları tügel, töp cire xalıq- Qırım Tatarları xäl itärgä tieş!



Möräcäğät axırında, Fäwziä Bäyrämova Awrupa Şurası, Xalıqara xoquq yaqlaw oyışmalarına möräcäğät itä. Rusiäneñ mondıy ğämällärenä yul quyarğa tieş tügellär alar di. Ägär, bäysez däwlätlär sostavındağı millätlärneñ üzbilgelänergä xoquqları tanıla ikän, Rusiä dä iñ berençelärdän bulıp Çeçnya häm Tatarstannıñ bäysezlegen tanırğa tieş. Dielä İttifaq firqäse liderı Fäwziä Bäyrämova yasağan belderüdä.

Räfis Cämdixan

XS
SM
MD
LG