Accessibility links

чәршәмбе, 7 декабрь 2016, Казан вакыты 23:32

Mäskäwdä açılğan dönya matbuğatı cıyınında Putinğa tänqit belderelde


Düşämbedä Mäskäwdä Bötendönya Gäzitlär Berläşmäseneñ yıllıq cıyını açıldı. 3 kön baraçaq çarada 100dän artıq ildän 1700läp möxärrir qatnaşa. Berläşmä citäkçese Gavin O''Relilly üzeneñ çığışında Rusiädä küpçelek mäglümät çaralarınıñ däwlät kontrolendä buluına tänqit belderde. Rusiä prezidentı Vladimir Putin bu tänqitne kire qaqtı.

Bötendönya Gäzitlär Berläşmäseneñ bu inde 59nçı cıyını. Mäskäwdä ul berençe tapqır ütä häm älbättä inde Kremlgä, "medianı awızlıqlawçı" sıyfatınnan arınu öçen yaxşı forsat bulıp tora. Rusiädä matbuğat ireklege torışın iskä alıp, Berläşmäneñ qayber äğzaları, cıyınnı Mäskäwdä ütkärügä başta qarşı çıqqan ide, läkin axır çiktä kilergä buldılar. Rusiä prezidentı Vladimir Putin üzeneñ sälämläw süzendä alarğa törtterep aldı:

"Törle öndäw, örketülärgä qaramastan, qırıqmıyça Mäskäwgä kilüegezne işetügä bik şatmın" di Rusiä prezidentı.

Alay da Putin isemenä tänqit cıyında yañğıradı. Berläşmä prezidentı Gavin O''Reilly üzeneñ çığışında, Rusiädä mäglümät çaralarınıñ zur öleşe xökümät kontrolendäge finans törkemnär tarafınnan satıp alınğan, näticädä xalıqnıñ mediağa ışanıçı kimi, Kremlneñ, çınlap ta bäysez, köçle mäglümät çaraları buluın teläwe şik tudıra dide ul.

Putin şunduq mondıy cawap qaytardı:

"O''Reilly äfände mäglümät çaralarında däwlät öleşe arta dide. Mindä başqa mäglümät – matbuğat bazarında däwlät aktivları öleşe kimi, monı ciñel genä tikşerep bula" di Rusiä prezidentı.

Putin Rusiäneñ 1991 yılda qabul itelgän Mäglümät çaraları turındağı qanunın dönyada iñ liberallärneñ berse dip atadı. Ul şulay uq Rusiädä 53 meñ waqıtlı basma, 3 meñnän artıq tele-radio kampaniä buluın äytte, bik zur teläk bulsa da alarnıñ barısın da kontrol itep beterep bulmıy dide ul. Xäyer, 3 il-küläm televidenie östennän kontrol bulğanda, monıñ ul qädäre kiräge dä yuqtır.

Cıyınnı Mäskäwdä ütkärügä kilgändä, Berläşmä äğzalırınıñ bu mäsälägä qaraşları ikegä bülende. Berläre - ütkärergä kiräk, turısın äytep söyläşü Rusiädäge wazğiätne yaxşırtırğa yärdäm itäçäk disä, başqaları – bayqot belderü xäyerleräk digän fikerdä. Misal öçen Ekstremal Jurnalistika Üzäge citäkçese Oleg Panfilov:

"Minem barmawım – üzenä kürä protest çarası. Süz ireklege awır xäldä bulğan ildä mondıy cıyın ütkärergä yaramıy. Rusiä problemalarına bağışlanğan maxsus cıyın bulsa – başqa xäl, ul çaqta Putin kilep Rusiädä bar da yaxşı dip çığış yasıy almas ide" di Oleg Panfilov.

Cıyın başlanır aldınnan natsional-bolşeviklar partiäse aktivistları zalğa kerep "Putin ireklek cälladı" digän şiğärlär qıçqırıp qäğäzlär tarattı. Bötendönya Gäzitlär Berläşmäse cıyını çärşämbedä qädär däwam itäçäk.

ali ğilmi
XS
SM
MD
LG