Accessibility links

Кайнар хәбәр

İstanbulda Başqortstan sänğät könnäre ütte


Başqortsan Sänğät Könnäre 4 Yün yäkşämbe könne İstanbulda Sultanahmet maydanında ütkärelgän sabantuy belän başlandı. Sabantuyğa Başqorstan Mädäniät häm Milli Säyäsät Ministrı İlişev belän Mädäniät häm Turizm Ministrı Koç qatnaştılar. Gärçä Sultanahmet maydanı Aya Sofiya, Sultanahmet mäçete, törle muzeylar totaşqan häm turistlar küp uqmaşqan urın bulu säbäple sabantuy öçen bik uñay tügel ide. Bälki turistlar, närsä bu, dip qızısınğandır.

Kiçen isä İstanbulnıñ Aziä öleşendä Umraniyädä 250-300 urınlı Bälädiyä teatr zalında Askar Gasparov Başqortstan Däwlät Biyü Ansamble sänğätkärläreneñ konsertı buldı. Barlıq sänğätkärlär matur biyülär belän tamaşaçılardan alqış cıydılar. Tik zalnıñ 40-50%-ğına tulğan buluwı, kiçke säğat sigezdä başlayaçaq dip iğlan itelsä dä 8:40’ta başlawı häm zalnıñ esse buluwı citeşsezleklär kebek bik toyılmadı. Läkin bigräktä ir biyüçelär bürekläre belän tirläp bettelär. Konsertta ğomumän Başqort biyüläre häm ber Rus xalıq biyüwe kürsätelde. Cırçılar arasında ber soprano Başqort xalıq cırı dip täqdim itelgän “Aşqazar”nı başqardı. “Karavanharay” törkemeneñ Tatarça cırlayaçağı isä anons itelmäde. Asılda bit Tatar mı Başqort mı anıñ cırında da, biyüwendä dä älä nindi zur ayırma yuq. Monı Töreklär bolay da añlamaslar ide. Ber säğat buyı däwam itkän konsert yegetlärneñ Törkiä-Rusiä-Başqortstan bayraqların säxnägä kütärep çığuwı belän tämamlandı. Düşänbe kön isä İstanbulnıñ Avropa öleşendä Cemal Reşit Rey konsert zalında Başqortstan sänğätkärläreneñ soñğı konsertları buldı.

Äxtäm İbrahim, İstanbul
XS
SM
MD
LG