Mäskäw prokuraturası Mäskäw militsiäse xezmätkärläreneñ universitet tulay torağında taciq studentların qıynawı turındağı xäbärne tikşerä.
Mäskäw prokuraturası räsmie Sergey Marçenko Azatlıq radiosına çärşämbe könne 6 taciq studentın üzlären militsiä xezmätkärläre dip tanıtqan keşelär törkeme qıynağan dide.
Alar studentlarnıñ aqçaların, kesä telefonnarın tartıp alıp, tawış kütärmäskä quşıp kitkän.
"Kilgän keşe xezmät tanıqlığın kürsätkän, üzen militsiä xezmätkäre dip tanıtqan. Ul nindider ğädäti bulmağan tanıqlıq kürsätkän. Anıñ artınnan 6-lap keşe kergän häm balon açqıçı, qayışlar, ayaqları belän bülmädä bulğan universitetnıñ taciq studentların qıynıy başlağan" dide Marçenko.
Studentlarnıñ kimendä berse xastaxanägä salınğan dielä. Qayber matbuğat xäbälärenä qarağanda, rayon militsiä başlığı bu xäl öçen ğafu ütengän.
