Accessibility links

якшәмбе, 11 декабрь 2016, Казан вакыты 09:08

Rawil Sabircan dönyanı gizärgä äzerlänä


Diñgez, okeannarnı xäzer bik küp köymälär gizsä dä, alar arasında Tatarstan alämen taqqanın kürü mömkin tügel ide. Läkin tizdän oçsız-qırıysız su kiñleklärendä qızıllı-aqlı-yäşelle bayraq astındağı yaxtanı oçratırğa mömkin bulaçaq. Millättäşebez Rawil Sabircan citäkçelegendäge komanda yaxtada dönyanı urap çığarğa niätli.

Tatarstan bayrağı astında su buylap bu tatarlarnıñ berençe genä säfäre tügel anısı. Tanılğan sportçı Almaz Aliev citäkçelegendä ber törkem inde 1991 yılnıñ avgustında uq Törkiägä barıp qayttı. Annarı alar tağın berniçä säyäxät qıldı. İdel, Bagira, Ence köymälärendä Almaz Aliev häm anıñ dusları Qara diñgez aşa Törkiägä barıp qayttı, Evropa tiräli yözde. Xäzer menä tağın ber millättäşebez su buylap yulğa çığarğa niätläp tora. Älege batır häm qızıqsınuçan keşe belän tanış bulığız - ul Rawil Sabircan. Qazanda yäşi, Tatpoligraf şirkäteneñ general’ direktorı bulıp eşli. Rawil äfändeneñ plannarı zurdan. Ul üzeneñ Fatima isemle köymäsendä dönya tiräle äylänep qaytırğa teli. Şuşı säfär turında tulıraq mäğlümät alır öçen bez Rawil Sabircannıñ üzenä möräcäğät ittek. Azatlıq tıñlawçılarına ul menä närsälär söyläde.

Min bu säfärgä inde 12 yıldan birle äzerlänäm. Şuşı säfär öçen 9 yıl elek yaxta, köymä dä yasadıq. Läkin äle şuşı köngä qädär cayı çıqmadı. Yä waqıt yuq ide, yä aqça citmäde, yä eşne qaldırıp kitep bulmadı. Xäzer menä berär yılğa säfärgä çığıp kitärgä mömkinlek bar. Bez 6 keşe cıyınabız, läkin daimi 3-4 keşe genä yözäçäk, barısı da ozaqqa ğailälärennän, eşlärennän kitä almıy. Çiratlap, almaşıp toraçaqbız inde. Säyäxätebezneñ maqsatlarına kilgändä, bez yal itep, dönya kürep, başqa illär, xalıqlar,mädäniätlär belän tanışırğa telibez

Sez zur, qatlawlı säyäxätkä äzerlänüçe Rawil Sabircannı işettegez. Bu könnärdä äzerlek eşläre inde tämamlanıp kilä, Rawil äfände häm anıñ komandası yül başlarında Qazannan yulğa çığarğa niätli.

Gölnaz İlgizär

XS
SM
MD
LG