Accessibility links

җомга, 9 декабрь 2016, Казан вакыты 04:52

Räximov Irınburdağı kiñäşmädä qatnaştı


Comğa könne Başqortstan Prezidentı Mortaza Räximov Irınburda eş säfärendä buldı. Anda Rusiä Prezidentınıñ İdel buyı federal okrugındağı Tulı wäqälätle wäkile qarşındağı Şura utırışı buldı. Utırışnı Rusiä Prezidentınıñ tulı wäqälätle wäkile Aleksandr Konovalov ütkärde. Mäğlüm buluınça, Konovalov äfände ber yıl çaması Başqortstan prokurorı wazifaların da başqarğan ide.

Irınburda ütkän kiñäşmä ike mäsäläne qarawğa bağışlanğan. Anıñ berse “Çik buyı häm tamojnya kontrolen köçäytü häm migratsiä säyäsäten kamilläşterü çaraları turında” dip atalsa, ikençese – “Cinayätçelekkä qarşı köräştä federal'' başqarma xakimiät orğannarınıñ töbäk oyışmaları häm Rusiä sub''yektları xakimiätläre eşçänlegen koordinatsiäläü” dip isemlängän ide. Älege mäsälälärneñ kütärelüe ğäcäp tügel, çönki cinayätçelek tä, tamojnya ölkäsendäge xilaflıqlar, rişwätçeleklär dä baştan aşqan xäzer Rusiädä. Bilgele, Başqortstannı da bu çirlär urap uzmıy.

İñ awır cinayätlär sanı buyınça Başqortstan İdel buyı federal'' okrugında berençe urınnarğa çığıp bara. Bu yıl başınnan ğına da Başqortstanda, misal öçen, 230 keşe üterü oçrağı terkälgän. Bu san atnaqiç könne Ufada ütkän kiñäşmädä bäyän itelde. Başqortstan prokurorı Sergey Xurtin räislegendä uzğan bu kiñäşmädä Başqortstannıñ Eçke eşlär ministrı Rafail Divaev, Federal'' İminlek xezmäteneñ Başqortstan idäräse başlığı İğor Çernokov, Başqortstan tamojnyası citäkçese Näcip Galikäev, Yuğarı mäxkämä räise Marat Väkilov häm başqa yuğarı citäkçelär qatnaştı.

Şulay itep, bu yıl başınnan ğına da, yäğni biş aydan artıq qına waqıt eçendä, Başqortstanda 230 keşe üterelgän. Dimäk, xoquq saqlaw oyışmaları urtaça isäpläwençä, bu yıl azağına älege san 500 dän dä artıp kitärgä mömkin. Ä bu bit zur ğına ber awılda yäşäwçe xalıq isäbenä bärabär. Östäwenä, bıyılğı 5 ay eçendä Başqortstanda yawız cinayätçelär qulınnan 500 dän artıq keşe sawlığı öçen zur zıyan kürgän, yäki ğärip qalğan.

Başqortstanda cinayätçelekkä qarşı köräş mäsäläläre häm başqa könüzäk problemalar buyınça ayırım söyläşü öçen, şimbä könne Aleksandr Konovalov Ufağa da kilä. Rusiä prezidentı wäkileneñ Başqortstanğa säfären respublika xakimiätläre räsmi xäbärlärdä “qunaqqa kilä” dip kenä xäbär itä, älbättä. Bu xaqta comğa könne respublikanıñ qayber gäzitlärendä maqtanıp häm ğorurlıq kiçerep tä yazdılar. İmeş, menä Konovalov äfände Başqortstannı onıtmıy häm Ufada Rusiä könen bäyräm itü qısalarındağı tantanalarda qatnaşaçaq ul. Misal öçen, tatar telendä çığuçı “Qızıl tañ” gäzite soñğı sandağı berençe bittä “Konovalov yaña wazifada da Başqortstan xalqı belän bergä” digän mäqälä bastırdı. Başqortstanda kiräkle keşelärne qunaq itä belälär inde anısı. Aleksandr Konovalovnı şimbä könne başta İşembay rayonında ütäçäk Sabantuy bäyrämen qararğa alıp baralar. Annan soñ ul, Ufağa qaytıp, biredäge zur tözeleşlär barışın qarap yöriäçäk häm kiçen Rusiä milli proyektların tormışqa aşıru xaqında kiñäşmä ütkärep, Tübän Novgorodqa qaytıp kitäçäge mäğlüm.

XS
SM
MD
LG