Accessibility links

Кайнар хәбәр

“Yosıf qissası” Rusiä Däwlät bülägenä layıq buldı


Bügenge xikmätle macaralar säxifäse bik qısqa bulır, çönki köndälek xäbärlär küp. Ällä nindi äkämätlär qayğısı yuq. Tormış üze teläsä nindi fantaziälärne uzdırıp cibärä. Ğap-ğadi xakimiät ğämäle turında äytäbez. Vladimir Putin 2005 yılda gumanitar eşçänlek ölkäsendä ireşkän qazanışlar öçen Rusiäneñ Däwlät büläklären birü turında färman çığarğan. Nihayät bu turıda räsmi xäbär dä çıqtı. Elekke yıllarda mondıy büläk aluçılarnıñ isemnäre ber gäcit bitenä tula ide. Xäzer gumanitar tarmaqta 6 büläk qaldırılğan. Ämma här büläkneñ bäyäse – 5 million sum. Uzğan yılda şuşı büläkne aluçılar arasında tatar qanlılardan Bella Axmadullina bar ide. Bıyıl Tatarstanğa bäyle 4 keşe büläkkä layıq bulğan. İcadi zıyalılar intelligentsiäneñ häm tatarlarnıñ xalqı xolqı häm xislären isäpkä alıp, bu lawreatlarnıñ isemnären iğlan itü bik küplär öçen zur sınaw bulır axrı. Çönki büläk bulu häm anıñ zur aqçalı – däräcäle buluı üzebezneñ respublikağa qaytuı bik äybät, ämma bit azmı-küpme qäläm tibrätkän, garmun-skripqa uynatqan can iäseneñ küñelendä şundıy qort selkenep quya, ä nigä miña tügel. Min bit tağın da talantlıraq, xezmätem tağın da zurraq. Şuña kürä bu sınaw kiçerügä äzerlek, profilaktika bulsın öçen xäbär itäbez – Fän häm texnologiä ölkäsendä İgor Gorınin häm Aleksandr Skrıynski digän ğälämät zur akademiklar, üzläre fänni institut direktorları İkeseneñ berse yabıq tematika, yäğni xikmätle, yäşeren açış öçen büläk alğanlığı da äytelä. Öçençe büläk iäse ruxi qimmätlärne saqlarğa yärdäm itü, mäğrifätçelek, tınıçlıq urnaştıru, cämğiätne tuplaw öçen Patriarx Aleksey 2гә birelä. Bu nämzät inde Rusiä Prezidentı öçen olılardan da olı, qäderlelärdän dä qäderle. İnde sänğät ölkäsendäge lawreatlarnı beleşik. Kinoakter, rejisser Aleksey Batalov lauterat medalen häm üzenä tieşle 5 million aqçanı alaçaq. Ataqlı muzıkant, pianist Mixail Pretnev ikençe, yäğni tağın ber lawreat. Aña da medal' häm 5 million sum aqça. Äytergä kiräk, M. Pletnev zamanında Qazan konservatoriäsendä uqığan dilär. Dimäk, şöhräte beraz tatarlar yağına da töşä. İnde öçençe häm soñğı büläkkä küçik. Monısı inde 800 yıl elek berençe tatar şağire Qol Ğali icat itkän Yosıf Qissası buyınça Qazan opera häm balet teatrında quyılğan spektakl' öçen birelä. Xäzer avtorların äytäbez. Kompozitor – Leonid Lyubovskiy, Qazanda xörmät itkän yähüd xalqı wäkile, libretto avtorı, Tatarstannıñ xalıq şağire Rinat Xaris häm büläkneñ öçençe iäse Yosıf turında qissa baletında töp partiäne uynağan Nurlan Kanetov. Alarnıñ här qaysı lawreat medalenä häm öçesenä urtaq premiägä layıq buldı. Tağın ber xikmät bar. Büläk turında färman çıqqaç ta, kiläse düşämbedä 12 iyün könne Rusiäneñ SSSRdan ayırılıp çıqqan möstäqillek könendä lawreatlar Mäskäw Kremlenä çaqırıla häm şunda alar üzlärenä täğäyenlängän büläkne bik tantanalı şarlarda alaçaq, Rusiä Prezidentı qulınnan. Här lawreat üze belän 5 keşene qunaq itep, Mäskäwgä Kremel'gä çaqırırğa xaqlı. Xäzer inde menä şuşı 15 qunaqnıñ isemlege tözelep Mäskäwgä Qazannan bilet alu mäşäqätläre belän yäşi yaña lawreatlar. Menä şundıy xällär. Tatarstan sänğät'kärläre bu sınawnı inşalla isän imin ütärlär, ä büläklänüçelärneñ yöräkläre şartlamas dip sanıy belgeçlär. Çönki mäxäbbät, xıyänät häm könçelek turındağı Yosıf qissası härkemneñ xäterendä.

Rimzil Wäli

XS
SM
MD
LG