Accessibility links

сишәмбе, 6 декабрь 2016, Казан вакыты 13:22

Zärqäwi bombalawdan soñ 1 säğät ütkäç ülgän


AQŞ xärbiläre süzçese General Mayor William Caldwell äl-Qaidäneñ Ğiraqtağı citäkçese Äbü Musab äz-Zärqäwi uzğan atnada Baquba şähärendä AQŞ hawa höcümennän soñ ber säğät çaması tere bulğan dip belderde. Caldwell äytüençä Zärqäwi yäşerengän urınğa berençe bomba töşkännän soñ ul 55 minutlap tere bulğan. DNA tikşerüläre anıñ çınnan da Zärqäwi buluın raslağan. AQŞ tabibı Steve Jones äytüençä, Zärqäwi şartlaw dulqınınnan ülgän. "Ülem säbäbe yabıq urında şartlawdan üpkä yarası. 2 bomba şartlawnıñ dulqınnarı üpkälären tişkälägän, zarar kitergän häm qanatqan. Bu yaralar tıştan qarağanda kürenmi, Alarnı üpkäsen qarap qına kürep bula" dide Jones. Äz-Zärqäwi häm suğışçı dip şiklänelgän tağın 5 keşe uzğan çärşämbedä AQŞ hawa höcümennän soñ hälak buldı. Ğiraqtağı äl-Qaidä törkeme Zärqäwi urınına yaña citäkçe bilgelägän dip xäbär itelä. İnternetta çıqqan belderügä qarağanda, törkem bertawıştan yaña citäkçe itep äbü Xämzä äl-Möhäcirne quyarğa kileşkän. Äl-Möxäcir könbatışta bilgele keşe tügel häm ul Zärqäwine almaştırır dip kötelgännär arasında da yuq ide.

XS
SM
MD
LG