Accessibility links

Кайнар хәбәр

Rusiä Könbatış belän mönäsäbätlären yaxşırtu öçen Könbatışnıñ PR şirkäten yalladı


Sänäğät üseşe alğa kitkän illärne berläşterüçe sigezlektä xäzerge waqıtta küçmä citäkçelekne alıp baruçı Rusiä qalğan citäkçelek çorında Rusiäneñ könbatış belän mönäsäbätlären yaxşırtu öçen Quşma Ştatlardağı Ketchum PR şirkäten yalladı. Bez bu uñaydan Kerchumnıñ Brüsseldäge tuğandaş şirkäte GPlus Europenı oyıştıruçılarnıñ berse Peter Guilfodqa bernpiçä soraw belän möräcäğät ittek.

AZATLIQ: Rusiä Ketchumnı qayçan yalladı?

GUILFORD: Alar bezne aprel başlarında, bik ozaq däwam itkän, berniçä şirkät qatnaşında New Yorkta häm Mäskäwdä ütkän qatı bäygedän soñ yalladı. Ämma berär şirkät yallaw turında qarar uzğan yıl axırlarına taba çıqqan bulğan.

AZATLIQ: Ketchumğa Rusiäneñ nindi säyäsi mäs''äläläre belän şöğellänü yöklängän?

GUILFORD: Bezneñ yöklämä Rusiäneñ säyäsäten üzgärtü tügel, ä anı kürsätü, bigräk tä 2006-nçı yılda, Rusiäneñ sigezlektäge citäkçelegen istä totıp. Bu çorda dönya matbuğatınıñ iğtibarı Rusiägä häm Sigezlekkä yünälä. Rusiä isä çınnan da komunikatsiä yağınnan köçsez. Şuña kürä alar häryaqlap yardämgä moxtac. Könbatış matbuğatınıñ niçek eşläwe turında kiñäşlär, oyıştıru yardäme, texnik yardäm, kürsätmä materiallar, internet materialları häm şundıy başqa närsälär kiräk.

AZATLIQ: Rusiäne könbatış PR şirkätenä möräcäğät itärgä närsä etärgän dip uylıysız?

GUILFORD: Minemçä, alar ğädäti şartlarda monı üzläre dä başqara aluların, ämma Sigezlektä citäkçelek itü ğädättän tış mömkinleklär birüen häm bu yılnıñ ğädättän tış eş itü kiräk bulğan ğädättän tış yıl buluın añlağan. Şuña kürä alar yül ayında Piterburda ütäçäk Sigezlek sammitın yaqtırtaçaq könbatış matbuğatınıñ eşen ciñeläytü maqsatında komunikatsiä eşlärenä häm başqa eşlärgä çit il şirkäten yallarğa qarar itkän.

AZATLIQ: Ketchumnıñ Rusiä belän moña qädär barğan xezmättäşlegeneñ berär kürenerlek näticäse buldımı äle?

GUILFORD: Bu äle eşneñ başı ğına. Bez başlanuına 5 atna ğına qalıp barğan Piterbur sammitı aldınnan bik nıq tırışabız. Şulay da bezneñ kiñäşlärgä qarağanda, matbuğatta Rusiäneñ Sibezlektäge eşçänlege turındağı yazmalarğa qarağanda, minemçä inde qayber üzgäreşlärne kürep bula.

AZATLIQ: Könbatış citäkçeläre Rusiägä yış qına awır süzlär äytä, bigräk tä soñğı aylarda. Sezneñçä Ketchum Rusiäneñ abruyın kütärüdä ni qädär yardäm itä ala?

GUILFORD: Çınnan da matbuğatta Rusiä häm anıñ dönyadağı berektäşläre arasında, energiägä, Ukrainağa häm başqa mäsälälärgä bäyle mönäsäbälätlär qıyın dip qabul itelä. Ämma matbuğat häm ğömümän cämäğätçelek şunı añlarğa tieş. Kiñräk qarasañ alar qağidädän çığarma ğına, qağidä bularaq isä Rusiä sigezlektäge berektäşläreneñ küpçelege belän şaqtıy tığız mönäsäbättä. Häm Rusiä Sigezlektä töp iğtibarın birgän mäs''älälär – yoğışlı awırularğa qarşı köräş, mäğärif häm energiä iminlege – bolar barısı da Könbatışnıñ maqsatları belän täñgäl kilgän mäs''älälär. Şuña kürä, minemçä alarnıñ maqsatı matbuğat soñğı arada matbuğatta Rusiägä bäyle qalqıp çıqqan 1 yäki 2 citeşsezlek belän artıq mawıqqanda anıñ iğtibarın kiñräk itep başqa mäs''älälägä dä yünältü.
XS
SM
MD
LG