Accessibility links

дүшәмбе, 5 декабрь 2016, Казан вакыты 19:56

“Azatlıq” radiosı iğtibar üzägendä


Soñğı könnärdä Qazanda Azatlıq radiosı, anıñ xezmätkärläre tiräsendä süzlär quyırıp kitte. Cirle kanallarda, matbuğatta bu turıda qayber närsälär işetelä. Küptän tügel Qazanda ütkän Rusiä cirle häm milli mäğlümat çaralarınıñ kongressında törle töbäklärdä eşläwçe 7 Azatlıq xäbärçese qatnaştı. Кongressçılar taraldı, ä azatlıqçılar haman Qazanda qaynaştı. Eş şunda ki, düşämbe könne Tatarstan başqalasında Azatlıqnıñ Rusiä töbäklärendä eşläwçe xäbärçeläreneñ kiñäşmäse buldı. Anı radiobıznıñ tatar-başqort redaksiäse mödire Färit İdelle alıp bardı.

Bu kiñäşmädä lirik tema, azatlıq mödireneñ 37 yıl buyı radioda eşlägännän soñ, tınıçraq statusta yäşärgä cıyınuı iskä alınsa da, süz nigezdä radionıñ bügenge häm kiläçäk tormışı turında bardı.

Bügen mäğlümat barı tik ber kanalda – radio yäki televidenie, gäcit aşa ğına yıraq kitä almıy. Mul'timedia, törle mäğlümat kanalları aşa dönyağa xäbär taratu häm yañalıqlarnı 2-3 säğät eçendä tıñlawçığa citkerü, bigräk tä tatar jurnalistları öçen möhim närsä bulıp tora. Xäzerge mäğlümat bazarında milli çaralar artta qala almıylar. Bu taläplärgä Sverdlovskiy, Tömän, Ufa, Omskiy, Qırım häm başqa yaqlarda eşläwçe tatar-başqort jurnalistları cawap birä alamı? Küp kenä töbäklärdä milli radio, TV tapşıruları qısqara, gäcitlärneñ tirajı kimi. Dimäk, Azatlıqqa eş arta bulıp çığa. Ä anı qayda, niçek tıñlıylar, kemgä işetelä, kemgä işetelmi ul kön sayın efirğa çığuçı Azatlıq?

Xäzer sezgä yaxşı tanış bulğan Fawiä, Firüzä, Kärim, Rämzit, Saniä, Diläwär kebek xäbärçelärneñ bu turıda fikerlären, şulay uq Färit İdelleneñ añlatmasın işetersez.

Fäwiä Safiullina: “Azatlıq” radiosı Sverdlovskiy ölkäsendä qısqa dulqınnarda tıñlaw qıyınlaştı. Soraw: Anıñ işetelüen yaxşırtır öçen ayırım berär oyışmalarnıñ “Azatlıq” belän kileşü tözep eşläp bulmas mikän ?

Firüzä Äpsälämova : Orenburgta İärçen tälinkälären “Yaña ğasır telekanalı”na köyläp quyu ısulı barlıqqa kilde.

Färit İdelle: Dollarnıñ bäyäse töşü säbäple qısqa dulqınnar bik qimmätkä töşä. Ukrainada bötenläy yabıp quydılar. Bez elek TNV belän üzebez kileşü tözegän idek . Soñğı yıllarda andıy kileşülär tözüne Amerikadağı Ay-bi-bi firması başqara. Läkin bu problemanı xäl itü mömkin.

Kärim Yauşev:Başqortstanda TNV kanalın kertep bulmawın, Başqortstannıñ däwlät tele- radiokanalı TNVnıñ Başqortstan belän eşlärgä litsenziäse bulmawı belän añlata, di.

Rämzit Äbüläev: Bezdän, ay sayın, däwlät radio televidenise xezmätkäre bularaq, “Azatlıq”ta xäbär birüçelärneñ isemlegen Başqortstannıñ prezidentına birep torunı taläp itälär.

Diläver Osman: Qırımda Azatlıq radiosı kiçke tapşırularğa qarağanda, irtänge yaqta yaxşıraq işetelä.

Saniä Mirxaliewa: Omskida däwlät byudjetındağı milli tapşırular bötenläy yabılıp bette. Tömändä äle azraq saqlanıp qaldı.

Şul uq oçraşuda Mordoviädäge xäbärçebez İrek Bikkinin Färit İdelleneñ at-anaları tuğan yaqlarda bulıp, fil'm töşerüen äytte.

İrek Bikkinin: Min ike büläk alıp kildem. Berse anıñ Qazannıñ 1000 yıllığına Mordoviädä basılğan “Uzı drujbı” dip atalğan kitap. Anı Şamil' Bikmaev büläk itep, yazıp birep cibärde.

Häm min üzem, Färit İdelleneñ ätise , änise häm tuğannarı turında alarnıñ awıllarına barıp 27 minutlıq video- fil'm töşerdem.

Azatlıqçılar inde üz töbäklärenä qaytıp kitte, ä Färit İdelle Tatarstandağı kollegaları, milli cämäğätçelek wäkilläre belän oçraştı. Çärşämbe könne ul turı efirda Yaña ğasır kanalında sorawlarğa cawaplar birep, üzeneñ iñ ğäziz xisläre häm fikerläre belän büleşte. Bu şaqtıy xikmätle häm dulqınlandırğıç söyläşü. Möğayın, ber cayı çığar Azatlıqta da bu xaqta äyterbez.

Rimzil Wäli

XS
SM
MD
LG