Accessibility links

пәнҗешәмбе, 8 декабрь 2016, Казан вакыты 11:08

Berençe "Mäxmütov uquları" başlandı


Pänceşämbe Tatarstannıñ Yäşlär eşläre, sport häm turizm ministrlıygında “Berençe Mäxmütov uquları” – “Hönäri mäktäptä intellektual' baylıqnı formalaştıru” dip atalğan xalıqara fänni-ğamäli konferensiä üz eşen başlap cibärde. İsemennän ük kürengänçä, konferensiädä Mirza Mäxmütovnıñ 80 yäşlegenä bağışlana. Mirza Mäxmütov – Rusiä mäğärif akademiäse häm Tatarstan respublikası Fännär akademiäseneñ äşraflı äğzası, pedagogika fännäre doktorı, professor. Konferensiä ike kön däwam itäçäk. Anda Amerika Quşma Ştatlarınnan, Rusiä töbäklärennän häm Qazannan ğalimnär qatnaşa. Oyıştıruçıları isä – Rusiä mäğärif akademiäse, Tatarstan Ministrlar kabinetı, Fännär akademiäse, respublikanıñ ministrlıykları, yuğarı uqu yortları, Tatar yäşläreneñ “Sälät” respublika ictimaği fondı. Pänceşämbe könne konferensiä qısalarında “tügäräk östäl” oyıştırıldı. Anda Qazan yuğarı uqu yortlarınnan wäkillär qatnaştı. Alar isä studentlarnıñ belemen, zıyalılığın arttıru turında süz alıp bardılar. Bilgele bulğança, şähärneñ küp kenä yuğarı uqu yortlarında törle berläşmälär bar, ämma alar populyar, yäğni modada tügel. “Tügäräk östäl”dä äytelgänçä, Sovet çorınnan ayırmalı bularaq, xäzer yuğarı intellektual' däräcä üze dä modada tügel. Yäşlärne cälep itmi. Şuña törle yullar ezlärgä kiräklegenä basım yasaldı. Misal itep, Tatarstannıñ «Breyn-klub»ı kiterelde. “Breyn-klub”qa berniçä yöz äğza kergän, alarnıñ kübese öçen intellektual' uyınnar yarış qına tügel, ä aralaşu, fiker alışunı kiñäytü mömkinlege dä. Pänceşämbe könne irtänge yaqta tügäräk östäl uzsa, töştän soñ konferensiägä kilüçelär Salix Säydaşev isemendäge Zur konsertlar zalında “Tamırlar” kantatasın tıñladılar. Anda Tatarstan Premyer-ministrı urınbasarı – mädäniät ministrı Zilä Wälieva da kilgän ide. Bilgele bulğança älege kkantatanıñ şiğeren “Sälät” fondı citäkçese Cäwdät Söläymanov yazğan.Xalıqara fänni-ğamäli konferensiäneñ plenar utırışı comğa – 16 mayda “Qazan” milli-mädäni üzägendä ütäçäk. Anda yäş buınnıñ belemen arttıru öçen mäktäplärne psixologlar belän tä'min itü, mentalitet häm fikerläw mäs’äläläre turında çığışlar qaralğan. Şulay uq citeşterüçelär häm eş birüçelärneñ belgeçlärgä quyılğan taläpläre, uqıtuda mäğlümatı-komp'yuter texnologiäläre häm fikerläwne üsterü mäs’äläläre qaralaçaq. Monnan tış sälätle balalarnı häm yäşlärne barlaw, alarğa yärdäm itü, iketellelek şartlarında fikerläw üzençälekläre kebek mäs'älälär turında süz baraçaq.

Landış Xarrasova

бәйле язмалар

XS
SM
MD
LG