Accessibility links

җомга, 9 декабрь 2016, Казан вакыты 10:51

Almaatada Aziä illäre citäkçeläreneñ iminlek mäsälälärenä bağışlanğan sammitı ütte


Citäkçelär terrorğa qarşı köräştä, energiä häm başqa mäs''älälärdä xezmättäşlekne arttırırğa dip kileşte. Qazaxstan prezidentı Nursoltan Nazarbayev Aziädä Üzara xezmättäşlek häm ışanıç buldıru Conferensiäsendäge çığışında töbäktä yarlılıqqa häm sotsial problemalarğa qarşı köräştä töp çara säwdä häm iqtisadıy mönäsäbätlärne kiñäytü dide. "Däwlätlärneñ iqtisadıy üseş däräcäse töbäktä totrıqlılıq täemin itü mömkinlegebezgä turıdan turı täesir itä. Qayber töbäklärdä yarlılıq häm sotsial citeşsezleklärneñ cäyelüe yaña qurqınıçlar tuuğa säbäp bula. Şuña kürä totrıqlı iqtisadıy üseş häm tärräqiät täemin itü däwlätlärebezneñ zaman problemalarına tieşle cawap birü mömkinlegebezne bilgeli" dide Nazarbayev. Aziädä Üzara xezmättäşlek häm ışanıç buldıru Conferensiäsendä qatnaşuçılar arasında Qıtay prezidentı Hu Jintao, Rusiä prezidentı Vladimir Putin, Paqstan prezidentı Pärwäz Möşärräf häm Äfğän prezidentı Xämit Qarzai da buldı. Küzätüçe däräcäsendä isä İndoneziä, Yaponiä, Ukraina, AQŞ häm BMO wäkilläre qatnaştı. Putin terrorçılıqqa häm ekstremizmğa, narkotiklar taşuğa häm xalıqara cinayätçelekkä qarşı köräşne canlandırırğa çaqırdı. Qıtay prezidentı Hu Nazarbayev kebek töbäktä iqtisadıy integratsiäne köçäytügä çaqırdı. Nazarbayev töbäktä tabiği möxitkä iğtibarnı arttırırğa da çaqırdı. "Soñğı berniçä yıldağı waqıyğalar tabiğat qazazaları häm texnologik faciğälär näticälärenä qarata küpyaqlı çaralar kürü häm aldan kisätü sistemaları buldıru öçen bergäläp eşläw kiräklegen açıq kürsätte. Bergäläp totrıqlı ışanıç sisteması buldıru belän bergä bez tiz mäğlümät almaşunı da oyıştırırğa tieş. Kiräkle mäğlümätneñ waqıtında bulmawı qaywaqıt yözlärçä meñ keşe öçen faciğägä äwerelä" dide Nazarbayev. 1999-nçe yılda oyıştırılğan Aziädä Üzara xezmättäşlek häm ışanıç buldıru Conferensiäsen tänqitläwçelär bu süz bazarınnan ällä ni yıraq kitmi, anda äytelgännärne tormışqa aşıru öçen tırışuçılar yuq di. Şulay da 17 ilne üz eçenä alğan bu törkem töbäk citäkçeläre Aziädä xezmättäşlekne arttırırğa telägän oçraqta şaqtıy näticäle oyışma bula ala. Naif Aqmal, Praga.
XS
SM
MD
LG