Accessibility links

якшәмбе, 4 декабрь 2016, Казан вакыты 01:00

Pavlovski Tatarstanğa qarata "qara PR" alıp barami?


Rusiä telekanalları yä bulmasa matbuğat çaraları Tatarstanğa yış iğtibar itälär. Nigezdä, törle zur çaralarnı yaqtırtalar. YÄ bulmasa, Mintimer Şäymievnıñ törle waqiğalarğa qarata fikerlären birälär. Qısqası, Federal' dip atalğan kanallarda Tatarstannıñ üz urını bar. Läkin, tänqit alay küp dip äytep bulmıy. Ä şağir äytmeşli tänqit kiräkle şäyder. Läkin, xäzer tänqittä dä süzeñne ülçäp söylärgä kiräk. Alay itmäsäñ, yä mäxkämä, yä başqa törle ğäyepläw.

Monısı ber xäl. Menä yal könnärendä bügenge Rusiä xaqimiäteneñ töp propagandistı, zamança äytsäk, piartexnoloğı Gleb Povlovsktiy Tatarstanğa qağılıp ütte. Anıñ elek çaq qına bäysez bulğan, xäzer gazprom şirkätenä buysınğan NTV kanalında Real'naya poltika, Çın säyäsät dip atalğan tapşıruı bar. Bu tapşıru açılğanda, Mäskäwdä piketlar bulıp uzdı. Demokratik qaraşlarda torğan yäşlär, Pavlovskiynıñ NTVda tapşıru belän çığuınnan riza tügelär ide. Piketlar uzdı, Pavlovskiy qaldı. Menä şuşı tapşırularnıñ soñğısında Tatarstannı imeş tänqitläde.

Mister Monbua digän keşe bar Pavlovskiy tapşıruında. Ul üzen Rusiä töbäkläre belgeçe dip sanıy. Älege mister, Tatarstanda barğan häm küpçelekkä bilgele bulğan fakt, waqiğalarnı üzeneñ qähqähäle tele belän sanap çığa. Alabuğa turında söyli, anıñ tarixına qağılıp uza, bügenge Alabuğa şähäre başlığı Şäymiev tarafınnan bilgelängän dip yalğış ıçqındıra, Alabuğa irekle iqtisat töbägenä başta Koreyänıñ ber firması kilergä teläp tä, annarı başqa ber şähärgä kitkänen äytä, anıñ urınına xäzer qıtaynıñ ber firması kilä di. Qazan turına küçä. Anıñ meñ yıllığı şikle bulsa da, federal' byudjettan 3 million dollar aldılar, şul aqçağa Qazannıñ iske yortları sütelde, Qazan kirmänendä , mondağı mäçetlärgä ğomumän oxşamağan mäçet tözelde di. Meñ yıllıqtan soñ, tözeleş azaydı. 40 protsentqa kimede di. Qazan ike telle şähär, bu ike tellelek Mintimer Şäymiev tarafınnan yaqlana. Ğomumän, Qazandağı ber genä möhim qarada anıñ röxsätennän başqa qabul itelmi dip däwam itä Mister Monbua. Qazan şähär Ustavı da Ginneslar kitabına kerterlek ikän, anda barı tik biş kenä matdä. Monnan soñ, Mister Monbua Qazansu yılğasında utrawlar tözep, anda yortlar salırğa niätlängän programma artında Şäymievnıñ ulı Radik tora dip söyli. Häm bolay däwam itä

Аудіо

Ber qarağanda, Mister Monbua söylägännär bernindi dä yañalıq tügel. Bu xaqta küp häm küptän söylilär. Monda faktlar yuq. Läkin, menä şuşındıy çığışqa qarata, Tatarstannıñ räsmi kanalı TNV programması qara PR dip bäyä birde. Häm, Rusiäneñ tanılğan säyäsät belgeçe Stanislav Belkovskiy belän äñgämä yasadı. Tegese isä, Povloskiy digändä, qolaqları ürä tora torğan keşe. Çönki, Ukrainada äflisun inqilabı barğanda Pavloskiy Yanukoviç yağında eşläde. Ä Yanukoviç ciñelde. Ä Belkovskiy Timoşçenko yağında. Anısı isä fikerdäşläre belän xakimiätkä kilde. Şunnan köndäşlek däwam itä. Belkovskiy, şuña kürä, TNV efirında Pavlovskiynıñ tapşıruın qara piar dip atadı. Häm Tatarstannı pıçratır öçen kemder 100 million tülägän dip belderde. Ğomumän, mondıy faktlarğa öleşçä genä tayanğan yazmalar öçen TNVnıñ, ähä, respublikağa qarata qara PR bara dip äytüe ğäcäbräk. Respublika räsmiläreneñ, Monda törle däräcädäge türälär turında süz bara, törle gönahların açqan sayın, yäki ayırım ber jurnalistnıñ uy fikerläre yañğırağan sayın bezgä taşlanalar dip qıçqıru da säyerräk kürenä. Süz dä yuq, qara PR xäzerge dönyada ğämäldä. Läkin, bar dönyağa bilgele bulğan faktlarnı sanap çığu , yä bulmasa başqa matbuğatta yañğırağan fikerlärne äytü, äle ul PRda, qara da, aq ta tügel bit. Kem belgän inde.

Räfis Cämdixan.

XS
SM
MD
LG