Accessibility links

дүшәмбе, 5 декабрь 2016, Казан вакыты 07:37

Omski yağında Sabantuylar


Uzğan şimbädä Omski ölkäseneñ ike tatar awılında - Bol'şereç'ye rayonınıñ Ülänkül häm Tara rayonınıñ İşäy awıllarında milli bäyrämebez Sabantuylar bulıp uzdı. Bäyrämnär awıl külämendä oyıştırılğan idelär. Äytergä kiräk, zamanalar üzgärep, ildä xakim itü räweşe dä üzgärgännän soñ Omski awıllarında milli bäyrämebezne ütkärü mömkinlege yuq däräcädä ide. Çönki bäyräm oyıştıru öçen finans tabu zur problemağa äylände. Döres, omskilılar bötenläy Sabantuysız qalmadılar, ölkäneñ nindi dä bulsa ber rayonında mädäniät ministrlığı tarafınnan ike yılğa ber märtäbä ölkä külämendä Sabantuy bäyräme oyıştırılıp kilä. Bu xaqta “Azatlıq” tıñlawçıları da xäbärdarlar.

Bıyılğı sabantuylar cirle üzidarä citäkçeläre , uqıtuçılar, tatar aktivistları tırışlığı, iğänäçelär yärdäme häm xalıq köçe belän oyıştırıldı. Ülänkül awılındağı bäyrämgä ayırım tuqtalğanda, bäyräm ütkärüdä cirle üzidarä qaramağında bulğan Çernalı, Tozqazan, Qaraqül häm Ülänkül awılları xalqınıñ barçası qatnaştı diärgä mömkin. Bäyräm başlanırğa ber-niçä kön aldan borınğıdan kilgän ğädät buyınça, matur itep bizälgän atlar cigep, qolğalar kütärep, ğarmunnar uynap, cırlar cırlap, milli kiemnär kigän yäşlär xalıqtan büläk cıyıp çıqtılar. Tosqazan mäktäbe uqıtuçısı Asiä Nazıyrova üzeneñ uquçıları belän Sabantuyğa bağışlanğan maxsus programma da äzerlägän ide. Balalar Härber yort yanında tuqtalıp, şiğırlär uqıdılar, cırlar cırladılar, iyüllär başqardılar. Ölkännär alarnı küz yäşläre aşa xislänep tıñladılar. “Räxmät sezgä, bezne yäşlegebezgä qaytardığız” dip, aldan äzerläp quyğan büläklären tapşırdılar.

Sabantuy bäyrämeneñ iğänäçeläre dä buldı. Alar: Omski neft' eşkärtü kombinatı general' direktorı İldus Särvärov, Ulänkül awıl xucalığı räise Räwf Musagitov, rayon üzägendä yäşäwçe eşmäkärlär Rifxat' häm Ramil Muratovlar, awıl fermerları Ratif Fäxretdinov häm Şämsetdin İbragimovlar. Köräş batırına täkäne awıl ölkäne - Mäületdin abıy Nazıyrov kiäwe Ğaziz Möxämetşin belän birde. Qunaqlar da qullarınnan kilgänçä yärdäm kürsättelär. Ä qunaqlar bäyrämgä Omski, Qazan, İjäw, Magnitogorski, Surğut, Tömän, Krasnoyarski şähärlärennän häm yaqın-tirä awıllardan kilgän idelär. Bäyrämdä awılnıñ ölkännäre dä qatnaştı. Alar arasında yäşe 80-nän uzğan Mänwiä apa Şixova da buldı. Ul üzeneñ bala çağında qatnaşqan Sabantuylarnı isenä töşerep aldı, ul çaqta xalıqnıñ bäyrämne ayıruça kötep aluı turında söyläde. “Bezgä bäyrämnärdä az bulsa da täm-tom elägä ide. Şunıñ öçen bik kötä idek Sabantuylarnı”, - dide ul.

Bäyrämne Ülänkül mäktäbe direktorı urınbasarı Rimma Mäçitova açıp cibärde, annan soñ süz cirle üzidarä başlığı, Sabantuynı oyıştıru komitetı räise Läylä Möxämmätşinağa birelde.Sabantuy älämen kütärü xezmät aldınğısı Linnur Fäxretdinovqa tapşırıldı. Xalıqnı bäyräm belän rayon başlığı Anatoliy Korçevoy häm rayonnın baş sud'yası Ğaziz Xayrullin täbrikläde.

Bäyräm şaw-gör kilep, kön buyına däwam itte. Mäydannarda sabantuy uyınnarı - at çabışı, köräş, bağanağa menü, çülmäk watu, qapçıq belän suğışu, baw tartışu, qul köräşe, su taşu, köngerä yögereşe kebek uyınnar bardı , alanlıqnı awıl xäwäskärläreneñ häm Omskidan kilgän “Umırzaya” kollektivınıñ çığışları görlätep tordı. At çabışında berençe kilüçegä büläkne – muzıkal' üzäkne Omski neft' eşkärtü kombinatı direktor İldus Särvärov bilgelägän ide. Bu büläkne Qoyğalı awılı yegete Artur Çumarov yawlap aldı. Sabantuy batırı bulıp Azat Niäzov qaldı. Aña täkä birelde. Törle uyınnarda qatnaşuçılarğa da sawıt-saba, kiem-salım, sölge-tastımal kebek istälekle büläklär birelde.

Tara rayonınıñ İşäy awılında da Sabantuy Ülänküldägedäy kürkäm uzdı. Ul awıl yanındağı alanlıqta İrtış yılğası buyında bardı. Oyıştıru eşlären şulay uq cirle üzidarä citäkçeläre, rayon üzägendä eşläp kilüçe tatar mädäniät üzäge aktivistları häm “Nur” ansamble sänğätkärläre belän berlektä başqardılar. Biredä dä bäyräm iğänäçelär yärdäme häm xalıq tırışlığı belän oyıştırıldı. Xalıq kön buyı bäyräm itte, aralaştı, uyınnarda qatnaştı, küñel açtı.

Östäp şunı da äytergä kiräk, İşäy awılında da, Ülänküldä dä, Sabantuy milli bäyrämebezneñ barlıq qanunnarğa turı kiterep oyıştırılğan ide. Oyıştıru eşlärendä aktiv qatnaşqan Cämilä Çumarova häm İldar Mamatov süzlärençä, bäyrämne döres oyıştırırğa alarğa aprel' ayında Qazanda Bötendönya tatar kongressınıñ başqarma komitetı ütkärgän Sabantuylar seminarında alğan belemnär yärdäm itkän. “Räsmi dairälärdän yärdäm az külämdä bulğanda da, teläk häm milli canlı tatarlar bulğanda Sabantuylar oyıştırıp bula.

Saniä Mirxaleewa, Omski

XS
SM
MD
LG