Qazannıñ Tınıçlıq bistäse başqalanıñ başqa rayonnarınnan üzeneñ tabiğäte, anda yäşäp yatuçı tatarlarnıñ, ruslarnıñ häm başqa millät wäkilläreneñ ber-bersenä bulğan dustanä möğallimäse belän ayırılıp tora. Bistädä 2500гә yaqın toraq yort bar. Başqalanıñ üzägennän çığıp kitep Tınıçlıqqa kilep kergän keşe awıldan kilep qalada yäşäwçe bulsa awılın iskä töşerä. Qalanıqı bulsa, atlı-tawıqlı, yäşel çirämle, ağaç qapqalı şähär yanındağı başqa möhitne kurep üzenä ikençe dönya aça. Tınıçlıq bistäse keşeläre isä başqalarğa iğtibar itmiçä üzlärençä yäşi birälär. Menä inde alar berniçä yıl rättän başqala Sabantuyı aldınnan üz bistälärendä ata-babalarıbızdan kilgän Sabantuyğa büläk-yaulıq cıyu ğadäten ütkärep kilälär. Bıyıl da bu ğädätne alar qamälenä kiterep, cırlap-biep, çäy tabınnarı äzerläp bistäne şaw-ğor kiterdelär.
Tınıçlıq bistäsendä Sabantuyğa yaulıq, büläk cıyu bäyrämendä, Qazan däwlät mädäniät häm sänğät universitetı studentları tatar milli kiemnären kiep uyınnar uynatıp, cırlap-biep xalıqnıñ küñelen açtı. Alarğa bu eştä uqıtuçıları da yärdämgä kilde. Mädäniät häm sänğät universitetında eşläwçe Gölzirä xanım söyli:
- Sörän salu, yaulıq cıyu studentlarğa qayberäwlär praktika dilär. Äye, ansı da bar inde. Läkin alarnıñ bersen dä köçläp çaqırmadıq, üzläre teläp kildelär. Mädäniät universitetı şäkertläre Tınıçlıq bistäsendä berniçä yıl yaulıq cıyuda qatnaşalar, alar öçen bu yäşäw mäğnäsenä dä äylände dip äytäsem kilä.
Studentlarğa cır-iyüllärne törleländerergä Tınıçlıq bistäsendäge 129 mäktäp balaları da bulıştılar. Mäydançıqqa çığırğa yatsınğan balalar çittäräk cırladı, şığır söyläde.Qırıydan bistäneñ xalqı, apa - abıylar, babay-äbilär, bala-çağalar qul çabıp tordılar. Yözläre şat, küñelläre kütärenke, Tınıçlıq bistäse äbie äytmeşli:
- Sabantuyğa qarağanda şuşı yaulıq cıyu ğädäte iñ küñellese inde anıñ. Başqası alay küñelle tügel, balaqayım!
Tınıçlıq bistäse citäkçelären yaulıq çıyu kebek yolalarnı yıldan-yıl däwam itärgä etärgän, oyıştırırğa bulışqan İl'yas abzıynıñ da millättäşlärenä äyter süzläre küp ide:
- Menä bez İdel buyı rayonında Tınıçlıq bistäsendä zur Sabantuy aldınnan ata-babalarıbızdan kilgän ğöref - ğädätne berniçä yıl däwam itep kiläbez. Bezgä bistäneñ citäkçeläre dä, mädäniät universitetı studentları yärdämgä kilde. Bistäbezneñ xatın-qızları köçe belän çäy tabını äzerlädek. Bu büläk-yaulıqlarnı Xoday quşsa Sabantuy batırlarına biräçäkbez.
Röstäm İsxaqi
