Pänceşämbe könne 22 iyündä milli tormışıñ epitsentrı Bank Aq bankı urnaşqan binağa küçüeneñ tirän mäğnäse bar. Eş şunda ki, Bötendönya tatar yäşläre forumınıñ plenar utırış açılğan bina häm xäzerge Aq bars bank binası sovet zamanında Yäşlär üzäge dip atala ide. Bu binanı yäkşämbe, şimbä ömälärendä eşlägän komsomollar yärdämendä tözedelär. Partiä yäki komsomol qaznasınnan da aqça kergän dilär. Perestroyqa häm yaña tormış başlanğaç, yäşlärneñ kunakxanäsen häm restoranın xökümätneñ ışanıçlı bankına äyländerdelär. Kunakxanä bankta qalsa da, yäşlär taläp itkäç, Tamaşa zalı alar qaramağına küçte. Şuña kürä, bank qarşındağı distälägän avtobuslarnı kürgän keşe 600 bankir qorıltayğa kilgän dip uylasa, yalğışqan bulır ide. Yäşlär üz yortlarında Bötendönya forumına cıyıldı.
Elekke SSSR illärennän, Rusiä töbäklärennän kilüçelär 500гә yaqın. Tatarstannan da 100ләп yeget häm qız bar. Prezidiumğa yuğarı citäkçelärdän Däwlät Sovetı räise urınbasarı Rimma Ratnikova, Yäşlär ministrı Marat Bariev, prezident kiñäşçese Rafail' Xäkimov häm törle töbäktän kilgän yäşlär wäkilläre saylandı. İñ urtada moña qädär cämäğätçelekkä tanış bulmağan yäş yeget- Ruslan Sabirov, bötendönya tatar yäşläre forumı räiseneñ urınbasarı. Forumnı ul açıp cibärde häm eşçe orğannarnı saylattı. 2 yıl elek ütkän forumda saylanğan byuro citäkçese Azat İslaev bik qatı awırıp kitü säbäple, bötendönya tatar yäşläre oyışmasınıñ xisabın häm tormışqa qaraşların Ruslan Sabirov citkerde.
Yaña tözelgän oyışma 2 yıl eçendä üzen kürsätergä ölgermäsä dä, tatar KVNı, yäşlär teatrlar festivale kebek çaralar ütkärgän. Üzebez dip atalğan yaña törkem belän dä xezmättäşlekkä kergän.
Ruslan Sabirovqa qädär sälämläw süzläre belän däwlät citäkçeläre çığış yasağanın da äytergä kiräk. Rimma Ratnikova yäşlärneñ ähämiäte, bügenge säyäsät, cirle üzidarä orğannarı tözelü kebek aktual' mäs’älälärgä qağıldı, matbuğat problemaların da urap ütmäde. Yäşlär häm sport ministrı Marat Bariev törle mädäni çaralar, KVN bäygeläre, festival'lär turında söyläp çıqtı. Yäğni, forum räise belän ministrnıñ çığışlarında urtaqlıqlar da bar ide.
Yäşlär, millät turında töpleräk häm tiränräk itep kongress citäkçese Rinat zakirov çığış yasadı.
“Äle berençe forumnan soñ bez äle kiçä genä kebek sawbullaşqan bulsaq ta, menä ike yıl ğömer uzıp ta kitte. Älbättä, üzgäreşlär küp bulğandır. Ämma yäşlär forumınıñ berençe forumı zur ähämiätkä iä buluın äytergä kiräk. Millät tormışında bu zur waqiğa. Berençe adım awır bula, ämma yäşlärebez millätneñ bügenge xälen añlap üzlärenä qibla bilgeli aldılar.Başlanğıç çor awır bulsa da, olı yulğa ayaqqa bastılar.”Rinat Zakirovnıñ çığışı basılıp çıqqannan soñ häm forum tämamlanğaç, yäşlär, millät temasına tiränräk analiz bireler. Ä forumnıñ plenar utırışında iñ berençe süz Başqortstan tatar yäşläreneñ Azatlıq oyışması räise Zaliä Axunovağa birelde. Bu çığış ütä dä pozitiv häm xisle buldı. Zaliä Axunova Başqortstan tatar yäşläre häm alarnıñ oyışmasınıñ Duslıqnı nığıtu, tatulıq yünäleşendä başqarğan eşlärenä zur iğtibar birde.
Äytergä kiräk, Zaliä Axunovanıñ başqortstan tatar yäşläre isemennän çığış yasap, üz respublikası ministrlıqlarına räxmät uquı delegatlarnı şaqqatırdı.
Tänäfessez, nisez 3 säğätläp barğan utırış torğan sayın xisleräk häm küp tösmerleräk buldı. Qıtaydan, Amerikadan, Äzerbäycannan häm başqa töbäklärdän kilgän yäşlär üzläreneñ teläklären belderdelär. İñ qızu häm aktual' çığışnı Fäuziä Bäyrämova yasadı. Ul yäşlärdä milli üzañ tärbiäläw häm milli däwlät tözü turında qaynar fikerlär citkerde, säyäsi öndämälär belän ictimaği añğa yünäleş birde.
Tatarstan xalıq şağire Robert Miñnullin delegatlar aldında yaña şiğeren uqıp, forumnıñ ruxi, mäğnäwi yünäleşen bilgeläde.
Ğomumän, plenar utırış törle töbäktän kilgän tatar yäşläreneñ milli xislären tärbiäläw, kiräkle yaqqa yünältü öçen faydalı buldı. Töşke aş waqıtında forumnıñ açılış plenar utırışı tämamlandı. İkençe plenar utırış forum yabılğanda, comğa könne ütärgä tieş.
Rimzil Wäli
