Accessibility links

Кайнар хәбәр

AQŞ İrannı Ğıraqnı butauda ğäyepli


Ğıraqtağı AQŞ komandirı general George Casey , Ğıraqtağı köç qulanuanıñ artında İran tora dip belderde. Anıñ süzlärençä, İran şiğıy radikalların öyrätä häm qorallandıra, alarnı terror aktlarında qullana.

AQŞ elegeräk tä İrannı Ğıraqta tıqşınuda ğäyeplägän ide. Läkin, general Caseyneñ Pentagondağı brifingı moña çaqlı bulğan iñ qatı tänqit dip bäyälänä. Anıñ süzlärençä, Ğıraqtağı iminlek mäsäläseneñ qatmarlı bulıp qaluında İran faktorlarnıñ berse bulıp tora .

"İminlek mäsäläsen qatmarlandırğan dürtençe faktor, ul İran. Teheran üzeneñ mäxsus köçläre yardämendä Ğıraqtağı Şiğıy radikal törkemnären qoral, şartlatqıç maddälär belän tämin itä, alarnı künegülärdän ütkärä. Künegülär İranda häm qayber oçraqlarda Livanda ütkärelä. Alar üz taraftarların Ğıraqta häm bezgä häm Ğıraq xalqına qarşı terror operatsiälärendä faydalana . Bu ber dä faydağa tügel. "

General Caseyneñ belderüenä qarağanda, vazğiät Ğinvardan birle naçarlanğan. İrannıñ Ğıraqnıñ Könyağında radikal törkemnärne yaqlauı arqasında başkütärülär artqan. Anıñ süzlärençä, İranlılarnıñ Ğıraqta xäräkät itüläre turında dälil bulmasa da, alar üzläreneñ berektäşe bularaq başqalarnıñ xäräkät itülärenä röxsät itälär. İran xökümätendäge qayber elementlar monı belälär häm xätta bälkim anda qatnaşalar da ikän.

"İrannıñ Revolitsion saqçılarnıñ mäxsus köçläre moña yünäleş birälär. Alar üz başlarına xäräkät itälär dip äytep bulmıy. Dimäk Teherannan kemder kürsätmä birep tora."

İrannıñ Ğıraqtağı radikal Şiğıy ruxanisı Moqtada Sadr häm anıñ Madxi militsiäsendä täsire zur dip xisaplana. Washington üz borçıluın İran xökümätenä citkerdeme son? Bu sorau brifingta qatnaşqan saqlanu ministere Rumsfeldqa quyıldı. Ul moña Dävlät departamentı cavap birergä tieş dip äytsä dä, süzlärenä östäp bolay dide

"Älbättä, min üz borçıluımnı açıqça äyttem. General Casey da monı eşläde. İranlılar bezneñ alarnıñ eşçänlege turında mäğlümätebezneñ buluın belmilär dip äytmäs idem. Alarnıñ eşçänlege amerikannarnıñ hälak buluına kiterä. "

Läkin, Washington üz borçıluları xaqında İran belän turıdan-turı söyläşülär alıp barmas kebek. Bu yılnıñ başlarında AQŞ Ğıraqtağı ilçese Xalilzadqa İran räsmiläre belän Ğıraq mäsäläsen tikşersen digän väkalät birgän ide. Teheram başta moña rizalıq birsä dä, soñğaraq andıy söyläşülärdän fayda bulams dip monı kire qaqtı.

Färit İdelle, Praga.
XS
SM
MD
LG