Accessibility links

якшәмбе, 4 декабрь 2016, Казан вакыты 04:59

Rimma Bikmöxämmätova: “Yäşlärgä yalğan kiräkmi!”


İkençe Bötendönya tatar yäşläre forumınıñ açılışında bik pozitiv çığış yasap, üze yäşägän Başqortstan respublikası ministrlığına räxmät uqığan tatar yäşläreneñ “Azatlıq” oyışması räise Zäliä Axunovanıñ çığışın aldağı tapşıruıbızda işettergän idek, xörmätle tıñlawçılar. Şulay uq Başqortstannan kilep, elek anda “Atna” gäzite jurnalistı bulıp eşlägän Rimma Bikmöxämmätovanıñ forumdağı çığışı isä menä nindiräk buldı:

Xäzer bu Ufa qızı cäncal kütärä dip borçılmağız. Qazanğa kilep ,ufa türälären bitärläw tuydırıp bette inde. Qayda da kem bay häm däräcäle, şunıñ tormışı ciñelräk. Fäqir häm xoquqsız millättäşlärebez härqayda da bardır, ber Başqortstanda ğına tügel. Şulay da milli tigezsezlek, milläteñne üzgärtü öçen basım yasawlar bigräk tä canğa tiä. Bu forumda bezneñ kemgäder räncep, kem östennänder äläkläp toru kiräk tügel. Min anıñ faydası da yuqtır, dip uylıym. Milli tigezlekne dawlağanda min Mäskäwgä, Strasburgqa ışanmıym. Min üzebezgä ışanam! Üzebez buldıqsız, peşmägän bulsaq, bezne toçno uzalar, taptıylar.

Rimma Bikmöxämmätova üzeneñ çığışında Tatarstan häm Başqortstan ğalimnärenä, säyäsätçelärenä häm milli xäräkät ädiplärenä däğwä belderde:

Xörmätle ölkän buın millätpärvärlär, bigräk tä gumanitar ğalimnär, ğalimnär häm milli xäräkät ädipläre! Sez bezgä, başqort häm tatar yäşlärenä, çişelmägän töyen qaldırasız. Niçämä yıl ällä nindi eşlär başqarıp, şul tatar häm başqort mäktäpläreneñ, mädäniät uçaqlarınıñ, teatrlarınıñ, gäzit-jurnallarnıñ bergäläşep kenä eşläwlären kileşterä almadığız.

İñ möhime - globalizatsiä şartlarında üz-üzlären saqlar öçen tatar häm başqort millätläreneñ ber-bersenä yärdäm itep, teräk bulıp, xäräkät itü yulları tabılmağan.

Rimma äytüençä, Başqortstan tatarları ruxi yaqtan basım kiçerä. Bu qıyın, läkin mondıy şartlar çınıqtıra. Ämma bez, yäş buın, elekke tozaqlarğa eläkmäskä tieş di ul. Xäzerge tatar häm başqort yegetläre, qızları, minemçä, ber-bersenä yaqınraq. Estrada, diskoteka, radio häm televideniedä yañğırağan cırlar urtaq. Ruslaşu, tuğan telne onıtu, şähär şartlarında üz milläteñnän oyalu, yäşerü şulay uq oxşaş di ul. Eşlär bolay barsa, tatarnıñ da, başqortnıñ da milli traditsiäläre dä, mädäniätläre dä, sänğät'läre dä cilgä oçaçaq. Qısqası, bezneñ arada doşmanlıq ta yuq häm mänfägat'lärebez dä ber. Ä ni öçen bez tınıç tügel? Yuğarı mäktäpkä yäki eşkä urnaşqanda millät ayıru xälläre bulsa, monıñ säbäbe nidä!? dip sorıy Rimma Bikmöxämmätova.

Bezneñ respublikada möstäqillek, suverenitet birep, barıbıznı da tigezlibez digäne tormışqa aşmadı. Tatarlarğa millät häm tel tigezlege biräbez, dip aldağannı da xäzer kürdek. Ufada zatlı binada atar teatrı açabız digännäre çep-çi yalğan bulıp çıqtı. Yäşlärgä yalğan kiräkmi! Bügen alarğa aqça, eş, uqu mömkinlege, torır urın häm milli tigezlek bulmasa, bernindi patriotlıq kötep bulmıy.

Rimma Bikmöxämmätovanıñ bu çığışı bäxäslär uyattı. Berniçä keşe Rimmanı forum byurosına saylağanda tawış birüdän totılıp qalsa da, Rimma zur küpçelek belän Bötendönya tatar yäşläre forumınıñ byuro äğzası itep saylandı.

Al'bina Zäynulla

XS
SM
MD
LG