Accessibility links

якшәмбе, 4 декабрь 2016, Казан вакыты 09:18

Soldat nigä qaça?


Bıyılnıñ may ayı azaqlarında Tatarstannıñ Tuqay rayonında urnaşqan 89572 sanlı xärbi berläşmädän ike soldat qaçıp kitä. İyün ayınıñ urtalarına qädär alarnıñ qaçuları xaqında kiñ cämäğätçelekkä bilgele dä bulmıy, qaçqınnarnı bälki, xärbi berläşmä üz köçläre belän genä ezlägänder, tabarğa ömetlängänder. 15 kön däwamında soldatlar qayda yörgännär, närsä aşağannar älegä mäğlüm tügel. Şulay da, 14 iyün könne Tuqay rayonı territoriäsendä cinayät eşlänä - yarım xärbi kiemle ike keşe, pıçaq belän qurqıtıp, beräwneñ "OKA" maşinasın urlap kitälär. Şuşı waqiğadan soñ cinayätçelärne ezläwgä militsiä dä quşıla. Häm menä, küptän tügel genä, Tuqay rayonı militsionerları Orenbur ölkäsendä maşina urlawçılarnı totalar. Cinayätçelär xärbi xezmättän qaçqan soldatlar, Maksimenkov häm Kosıyrev bula. Alar armiägä Ural yaqlarınnan çaqırılğannar . Soldatlarnı qaçırğa närsä mäcbür itkän ? Xezmät awırlığımı, "dedovşçina" digän närsäme ? Şunı açıqlaw maqsatınnan berniçä tapqır älege xärbi berläşmägä bardım. Läkin kontrol' - ütkärü işeklärennän arı ütä almadım. Kerep - çığıp yörgän soldatlar bu xaqta söyläşergä telämädelär. Şulay da berse, "aşaw äybät, qıyırsıtu yuq, ber yıl xezmät itkännän soñ ni öçen qaçqannardır, añlıy almıym, " - dide. Şulay da , xärbi çast'neñ komandirı Ramil Ğibadullin belän elemtägä kerü mömkin buldı häm ul Azatlıq xäbärçesenä"

- Matbuğatqa xörmätem zur, läkin qayber faktlarnı bolğatıp beterälär, şunlıqtan bulğan waqiğa xaqında söyläşäsem kilmi - dide. Qısqa ğına äñgämä barışında polkovnik Ğibadullin, Orenburda totılğan soldatlarnıñ Bögelmä tikşerü izolyatorına kiterülären, maşina talaw oçrağı buyınça Tuqay rayonı eçke eşlär bülege tikşerüçeläreneñ şöğellänüen, cinayät eşenä açıqlıq kergäç, yegetlärneñ armiä xezmätennän qaçuların xärbi prokuratura tikşeräçägen äytte. İnde qaçunıñ säbäplärenä kilgändä, cawap mondıy :

- Ni öçen qaçuların äytä almıym, çönki min telepatik köçkä iä tügel. Bu - älege soldatlarnıñ şäxsi tärtipsezlekläre genä dip sanıym.

Xärbi berläşmä komandirı polkovnik R.Ğibadullin fikerläre buldı.

Tuqay rayonınıñ Yaña poselogındagı älege xärbi çast'tä Tatarstannıñ rayon häm şähärlärennän dä yegetlär xezmät itä. Şuşı temanı öyrängän waqıtta, armiä xezmätennän bik yıraq tormağan beräw, isemen äytmäwne soradı, mondıy fiker citkerde : "Çallıdan şuşı xärbi çast'qa xezmätkä çaqırılğan yegetlär başqa regionnardan kilgän soldatlarğa qarta üzlären bik qırıs totalar ikän" Bu süzlär ni däräcädä däresme, yuqmı, aldağı tikşerü eşläre kürsäter

Ğafiullla Ğaziz, Çallı

XS
SM
MD
LG