Accessibility links

шимбә, 3 декабрь 2016, Казан вакыты 05:31

Çeçen qarşılığınıñ yaña citäkçese höcümnärne Rusiägä küçerü belän yanıy


Ğäbdelxälim Sadullayev ülemennän soñ çeçennärneñ bäysezlek xäräkäten citäklägän Doku Umarov üzeneñ berençe belderüen iğlan itte. Anda ul Rusiäneñ Çeçnädä haman da suğış alıp baruı sürätendä çeçen qarşılığınıñ kiläçäge turında söyli, höcümnärne Rusiäneñ üzenä cäyelderü belän kisätä.

Çeçnä bäysezlege öçen qorallı köräş alıp barğan köçlärneñ citäkçese itep Doku Umarov, Rusiä ğäskäriläre 17-nçe yündä Ğäbdelxälim Sadullayevne ütergännän soñ bilgelängän ide. Şuşı yaña urınında yasağan berençe belderüendä Umarov, Çeçnä bäysezlege öçen köräşne xäzer Rusiä cirlärenä cäyelderü xästärlege alıp barıla, digän kisätü yasıy. Anıñ süzlärenä qarağanda, höcümnär Rusiä qorallı köçläreneñ xärbi nığıtmalarına yasalaçaq.

Şuşı belderüen Doku Umarov çeçen ğisyançılarınıñ internettağı chechenpress.com säxifäsendä urnaştırdı. Anda şulay uq, bäysezlek eşenä xiänät itkän ayıruça mäkerle satlıqcannarğa qarşı köräşü öçen maxsus bülekçä qorıla, dip tä äytelä. Anıñ şuşı plannarın ğämälgä quyu cäyge aylarğa bilgelängän.

Ämma älege belderüneñ şaqtıy suğışçan buluına qaramastan, Umarov çeçen qarşılığı höcümnäreneñ fäqät xärbi qorılmalarğa ğına yasalaçağın wäğdä itä. İkençe ber çeçen başlığı, Şamil Basayevtan ayırmalı bularaq Doku Umarov ğadi xalıqqa qarşı höcümnär oyıştırunı kire qağa.

Rusiägä qarşı köräşne kiñäytü elekke citäkçe Sadullayev çorında uq başlanğan ide inde. Şul maqsatta anda Rusiägä qarşı 6 front qorıldı, alarnıñ 4-se Çeçnäneñ üzendä, berse kürşe Dağstanda, häm tağın berse Tönyaq Kavkaznıñ başqa töbäklärendä ide.

Doku Umarovnıñ soñğı plannarın çeçen qarşılığınıñ tışqı eşlär ministrı bulğan Äxmät Zakayev bolay bäyäläde:

"Yäşeren ğisyan köräşeneñ taktikası daimi üzgärtelep torırğa tieş, ämma töp maqsat älbättä, elekkeçä qala", di Äxmät Zakayev çeçen qarşılığınıñ Doku Umarov citäkçelegendäge xäzerge köräşe turında.

Zakayev süzlärenä qarağanda, çeçen qarşılığı Rusiä belän nizaqnı säyäsi yullar aşa çişüne alğa sörä, ämma Mäskäw yağınnan moña bernindi dä mönäsäbät kürsätelmi, şunıñ näticäsendä çeçen mäs''äläse üzennän üze köç qullanuğa äylänep qala.

"Mondıy şartlarda çeçen qarşılığı çitäkçelege häm anıñ qorallı köçläre nizaqnı Çeçnä tışına kiñäytü, Kremldäge zolım xakimiatkä qarşı toruçılarnıñ tä''sir zonasın arttıru kiräk dip isäpli", di çeçennärneñ sörgendäge tışqı eşlär ministrı Äxmät Zakayev.

Kärim Kamal
XS
SM
MD
LG