Accessibility links

шимбә, 3 декабрь 2016, Казан вакыты 07:41

Babiç isemendäge büläklär tapşırıldı


Başqortstanda yıl sayın yäşlärgä ädäbiät, sänğät häm arxitektura ölkäsendäge zur uñışları öçen Şäyexzadä Babiç isemendäge däwlät premiäläre tapşırıla. Bıyıl bu büläkkä başta 12 keşeneñ eşläre täqdim itelgän ide. Şularnıñ cidese ikençe etapta däğwaçılar isemlegenä kertelde. Ul isemlektän kürenüençä, anda barısı da diärlek başqort yegetläre belän qızları ide.

Comğa könne Başqortstan Xökümäte yortında Şäyexzadä Babiç isemendäge büläkneñ yaña iäläreneñ isemnäre iğlan itelde. Ciñüçelär öçäw bulıp çıqtı. Alarğa premiälär bilgelären häm aqçalata küçtänäçlärne premer-ministr Rafael Baydäwlätov tapşırdı. Baydäwlätov – Bezdä Babiçnıñ danlı eşlären däwam itärlek layıqlı yäşlär citärlek. Şunısı öçen quanıçlı. Alar här ölkädä bar. Här tarmaqta aldınğı eşläre belän tanıla alar.

Bıyıl Şäyexzadä Babiç isemendäge däwlät bülägenä Ufadağı arxitektorlar ostaxanäse citäkçese İldar İbrahimov, yäş cırçı, Başqortstan däwlät filarmoniäse artistı Xäsän Usmanov häm Fransiädäge xalıqara bäygedä ciñep qaytqan muzıykant-pianistqa Äminä Şafiqowa layıq dip tabıldı. Alarğa premiäneñ bilgeläre belän bergä, härbersenä 50 şär meñ sum aqça da tapşırıldı.

Şäyexzadä Babiç isemendäge büläkkä soñğı yıllarda, ğädättä, başqort qızları belän yegetläre layıq bula. Başqa millät wäkilläre ällä üzläre täqdim itelmi bu bäygegä, ällä alarnı kertmilär. Başqortstandağı tatar icatçılarınıñ da bu märtäbäle isemgä layıq bulğanı yuq. Tatar yäşläre arasında da Babiç bülägenä layıq bulırlıq talantlar bar inde, yuğisä. Gel başqort yäşläre genä büläklänep kilgäç, älege büläkneñ isemen Başqortstan yäşläre büläge dip tügel, ä başqort yäşläre premiäse dip üzgärtergä täqdim itüçelär dä bar. Şulay bulsa, başqalarğa räncergä urın da qalmas ide.

Fänis Fätxi, Ufa









XS
SM
MD
LG