Qazan rayonnarında uzğan Sabantuylarınıñ härqaysında üzençälekle programma äzerlängän ide. Alar belän tanıştıru öçen bıyıl Sabantuy bäyrämeneñ internetta saytı da buldırıldı. Läkin milli bäyrämneñ rus telendä genä buluı säyer toyıldı. Jurnalistlar öçen dä böten mömkinleklär tudırıldı. İrtädän ük rayonnarda uzuçı Sabantuylar belän tanıştıru öçen alarnı maxsus avtobus belän tanıştıru öçen alıp çığıp kittelär. Berençe bulıp Mäskäw rayonına yul alındı.
Mäskäw rayonı Sabantuyına kilüçelärne Tuqay äkiätlärenä nigezlängän Bıltır häm Şüräle qarşı alsa, Sovet rayonı, yäğni Därwişlär bistäse Qayınlığında Xuca Nasretdin fol'klor üzäge şatlandırdı. Şulay uq älege Sabantuylarda balalar öçen dä, veterannar öçen dä ayırım mäydançıqlar buldırılğan ide.
Läkin iñ zur Sabantuy bıyıl “Qazan” at-sport kompleksında uzdı. Anda märtäbäle qunaqlar da buldı. Rusiäneñ elekkege prezidentı Boris Yel'sin, Rusiäneñ Transport ministrı İgor Levitin, Rusiä Prezidentınıñ İdel buyı federal' okrugıyndağı wäkile Aleksandr Konovalov, İnguşetiäneñ elekke prezidentı Ruslan Auşewnı Tatarstan citäkçelege wäkilläre Sabantuy belän tanıştırıp ozata yördelär. İdel buyı häm Sovet rayonı Saban tuyların Tatar yäşläre forumına kilgän 600 millättäşebez dä küzätte. Qısqası qunaqlar yıldağıça küp buldı.
İppodromdağı bäyrämdä törle millät wäkilläre, respublikadağı törle rayonnarnıñ üz poçmaqları buldırılğan ide. Bäyrämneñ räsmi öleşe başlanğançı xalıq konsert qarap, törle rayonnardağı mädäni programmalarnı küzätte, kön esse bulu säbäple, küpläre çatırlar eçenä kerep utırıp sıra, sok eçüne qulay kürde.
Bäyrämgä Tübän Qama häm Çallı nıqlap äzerlängän ide. Alar zur konsert programmaları belän xalıqnı äsir ittelär.
Bäyrämneñ räsmi öleşen Qazan merı İlsur Metşin açıp cibärde. Qotlaw süzlären citkerde Ul berençe tapqır şundıy şähärküläm bäyräm uzuın uñışlı dip bilgeläp uzdı. Anıñ süzlärennän soñ salyut buldı. Bäyräm cır-iyüllär, sport uyınnarı belän däwam itte. Sabantuynıñ at-sport kompleksında uzuı säbäple, at çabışların qarawğa ayıruça küp keşe cıyılğan ide. Sabantuy ” bülägenä “Vosxod“ zavodınıñ Ekster atı berençe kilde. Aña 175 meñ sum birelde. At çabışlarınıñ ğomumi büläk fondı – 350 meñ sum ide. Çabışlarda barlığı 16 at qatnaştı.
äKöräştä isä TR atqazanğan sport ostası Röstäm Muxamov yauladı. Ul täkä häm «WAZ-2114» maşinasına iä buldı.
Landış Xarrasova
