Accessibility links

якшәмбе, 4 декабрь 2016, Казан вакыты 21:36

Tatar balaları nindi belgeçleklär saylıy?


Uramda ğına tügel, yuğarı uqu yortlarında da xäzer bik qızu çor. Uquçılar ata-anaları belän yanıp-peşep üzenä fakul'tet, belgeçlek saylıy, uqu yortlarına ğarizalar tapşıra. Tatar däwlät humanitar pedagogika universitetında tatar tele häm ädäbiäte, çit tellär häm yuridik fakul'tetlarına çiratlar bigräk tä ozın buldı. Älege uqu yortına uqırğa kerü öçen ğarizalar tapşıru inde atna däwamında bara. Häm ul 15 iyülgä qädär däwam itäçäk. Bu xaqta bezgä qabul itü komissiäseneñ cawaplı särkätibe Röstäm Minnäxmätov äytte. Ul şulay uq tatar balalarınıñ nindi belgeçleklär saylawı, alar öçen qaralğan östenleklär turında söyläde:

Ğarizalarnı bez 19iyünnän qabul itä başladıq. Häm alarnı nigezdä aldağı yıllarda mäktäpne tämamlağannar tapşıra. Çönki bıyılğı wıpuskniklarğa moñarçı attestat qulğa eläkmäde. Barı bügen genä älege uquçılar qabul itü komissiäsendä kürenä başladı. Bügenge könne 100dän artıq ğariza qabul itärbez dip uylıym. Uzğan yılda ber könne 300-350 ğariza qabul itkän waqıtlar da buldı. Bıyıl alda niçek bulır, waqıt kürsäter.

Tatar balaları törle belgeçleklärne saylıy. Tatar tele häm ädäbiäte fakul'tetı ğına tügel. Bezneñ universitetta bit tatar mäktäbendä matematika häm informatika, fizika, tarix, rus tele, geografiä häm başqa şundıy belgeçleklär bar. Uzğan yılda bez tağın ber belgeçlek kerttek – tatar mäktäben tämamlawçılar öçen ingliz tele buyınça başlanğıç belem birü. Mondıy belgeçlekkä rus balası uqırğa kermi inde. Bilgele inde şähär häm awıl balasınıñ uqu buyınça äzerlege şaqtıy ayırıla. Şuña kürä älege belgeçleklär kertelüe tatar balalarına uqırğa kerüdä häm uquda yärdäm çarası bulıp tora.

Tatar däwlät humanitar pedagogika universitetınıñ qabul itü komissiäseneñ cawaplı särkätibe Röstäm Minnäxmätov buldı. Uqırğa kerer aldınnan abiturientlar öçen maxsus äzerlek kursları oyıştırıla. Älege kurslarnıñ bäyäse 2 meñ sum. Alar iyülneñ berennän unbişenä qädär däwam itäçäk. Ä inde iyülneñ 17sennän iñ qatlawlısı - imtixannar tapşıru çorı başlana.

Al'bina Zäynulla

XS
SM
MD
LG