Accessibility links

пәнҗешәмбе, 8 декабрь 2016, Казан вакыты 17:18

Omskida millätara festival


Uzğan şimbä-yakşämbe könnärendä Omski ölkäseneñ İselkül rayonında çiktäş territoriälärneñ II xalıqara festivale ütte. Anıñ töp oyıştıruçısı ölkä külämendä eşläwçe “Duslıq yortı” yortı buldı. Älege festival' “Yedinenie” milli mädäniätlär festivale qısalarında oyıştırıla torğan çirattağı maqsatlı çara ide. Anda Omskinıñ Qazaqstan belän çiktäş bulğan 9 häm başqa rayonnarınnan cämğısı 35 kollektiv qatnaştı. Qunaqlar Qazaqstannıñ Pawlodar häm Tön'yak Qazaqstan ölkälärennän buldılar. Festival' ike kön däwamında bardı: berençe könne açılu serremoniäse häm törle milli kollektivlar qatnaşqan zur konsert rayon üzägendä ütte, ikençe könne milli uyınnar, sport yarışları belän älege rayonnıñ Margenaw awılı yanındağı alanlıqta däwam itte. Annan tış ayırım mäydançıqlarda rus, tatar, qazaq, ukrain, belorus, ärmän, yähüd, nemes, latış häm başqa xalıqlarnıñ milli rizıqları quyılğan, qul eşläre, yort-cir kiräk-yaraqları, milli kiemnäre kürsätelgän kürgäzmälär eşläde, ber ük waqıtta säxnädä Omski ölkäse häm Qazaqstan kollektivlarınıñ çığışları bardı.

Älege çarada tatar kollektivları aktiv qatnaştı. Omskidan “Umırzaya” ansamble, “Ömet” balalar törkeme, Kolosovka rayonınnan “Mäxäbbät” kollektivı buldı. Ä Qazaqstan yağınnan Pavlodar şähärennän “Miras” häm “Yalqın” kollektivları kilgän idelär. Bu kollektivlar urtaq tatar mäydançığı yasap, kürgäzmä, milli rizıqlar östäle häm uyınnar oyıştırdılar. Anda kön buyına tatar cırları yañğıradı.

Tatar mäydançığınıñ töp xucaları “Umırzaya” ansamble üzeşçännäre buldı. Festival' barışında alar ölkä häm rayon citäkçelegennän torğan delegatsiäne qabul ittelär, räsmi qunaqlarnı milli rizıqlar, sötle çäy belän sıyladılar. Alar arasında Omskinıñ qanunnar çığaru cıyılışı deputatı Rawil Bikbavov ta bar ide. Ul: “Bäyräm bik oşıy, çın küñeldän eşlängäne kürenep tora,”- dide

Tatar mäydançığında barğan uyınnarda başqa millät wäkilläre dä küpläp qatnaştı. Margenaw awılı qızları, tatar kiemnäre, iyülläre oşıy didelär.

Qazaqstannıñ Pawlodar şähärendä yäşäwçe millättäşlärebez tormışı belän berniqädär tanıştırıp kitü dä urınlı bulır. Citäkçeläre Venera xanım İvanova süzlärençä, “Miras” vokal' ansamble küptän tügel 15 yıllığın bäyräm itkän. Şähärdä yäşlärneñ “Yalqın” biyu törkeme eşli, 50 balanı berläştergän östämä belem mäktäpläre bar, anda balalar atnağa ike märtäbä uqıylar, ğäräp imlasen, tatar telen öyränälär, konsert programmaları äzerlilär, teatr tügärägendä şöğellänälär. Venera xanımnıñ 10-12 yäşlek ike qızı da bu mäktäptä uqıy, äniläre alarnı tatarça söyläşergä öyrätkän, qızlar tatar cırların da yaratıp başqaralar. Festival'gä isä ul iñ näni qıznı alıp kilgän ide. 5 yäşlek Rawilä İbrahimova ansambl'gä cırlarğa yöri.

Tatar mädäniät üzägen Pawlodarda Mönir Xamit ulı Galiev citäkli. Eşlekle häm buldıqlı citäkçe di Venera xanım anıñ turında. 2 iyüldä Pawlodar ölkäsendä Sabantuy bäyräme ütkärelä, anda ölkäneñ 5 rayonında yäşäwçe tatarlar qatnaşaçaq.

Omski ölkäsendä oyıştırılğan festival'dä Pawlodarlılarnıñ çığışı kürkäm buldı: “Miras” ansambleneñ moñlı cırları da, “Yalqın” törkemeneñ yalqınlı iyülläre dä tamaşaçılar küñelenä xuş kilde.

Çiktäş territoriälärneñ xalıqara festivale dip isemlängän çara milli bäygelärdä, sport yarışlarında berençe urınnarnı yawlawçılarnı büläkläw belän tämamlandı.

Rozaliä Sayganova, Omski

XS
SM
MD
LG