Accessibility links

чәршәмбе, 7 декабрь 2016, Казан вакыты 23:28

Berlinda Räşit Wahapov isemendäge tatar cırı festivale uzdı


Şuşı könnärdä genä Berlinnan Qazanğa ber törkem jurnalistlar häm artistlar qayttı. Qazanlılar Berlinğa Sabantuyda qatnaşırğa häm Räşit Wahapov isemendäge II xalıqara tatar cırı festivale qısalarında konsert ütkärergä bardılar. Şuşı ike çara ber ük könne, 24 yündä uzğan. İrtän Germaniä tatar-başqortları milli bäyrämne bilgeläp ütte, ä kiçen isä, Berlindağı Rusiä fän häm mädäniät yortında Wahapovnıñ cır festivale bulıp uzdı. Älege çara turında tulıraq itep bez Tatarstan jurnalınıñ baş möxärrire Rifat Fättaxovtan soraştıq.

Älege çaralarda qatnaşır öçen Tatarstannan Germaniägä Zilä Sönğätullina, Ferdinand Säläxov häm başqa sänğät ähelläre kilde. Şulay uq Finländiädän Cämilä Nizametdin, Şvetsiädän Gölüsä Ziatdin, Germaniädän Aydar Ğäynullin, Güzäl Qormaevalar kilde. Bu tatar cırınıñ triumfı buldı. Çarağa Berlinda yäşäwçe tatar, başqortlar ğına tügel, ä törle törki xalıqlar wäkilläre, almannar da kilgän ide. Konsertta Germaniä universitetınıñ maxsus tyurkologiä institutı ğalimnäre dä qatnaştı. Alar monda üzläreneñ fänni qızıqsınuın belderep kildelär

Äytergä kiräk, uzğan yıl başlanıp kitkän festival’ xäzer bik kiñ qolaç cäyep ütkärelä. Küptän tügel genä, Rifat Fättaxov citäkçelegendäge delegatsiä Latviägä barıp, Riga şähärendä dä tanılğan çırçınıñ icatı belän tanıştırıp qayttı. Fättaxov süzlärenä qarağanda, şunıñ belän älegä festival’neñ xalıqara öleşe tämamlana. Xäzer çaranı oyıştıruçılar üzläreneñ töp iğtibarın Rusiä töbäklärenä yünältergä telilär. Yaqın arada Räşit Wahapov festivaleneñ konsertları İjaw, Sember, Çabaqsar şähärlärendä oyıştırılaçaq. Noyäber axırında isä tatar cırı söyüçelärenä festival’neñ yomğaqlaw konsertları täqdim iteläçäk.

Gölnaz İlgizär

XS
SM
MD
LG