Accessibility links

якшәмбе, 11 декабрь 2016, Казан вакыты 16:54

Çallıda bäxäsle mäxkämä eşe axırına yaqınlaşa


Çallıda şaqtıy zur bäxäslär tudırğan mäxkämä eşe axırına yaqınlaşıp kilä. 2005 yılda KamAZ aksionerlıq cämğiätenä qarağan timerçelek zavodınıñ general' direktorı Xänäfi Garipov qulğa alınğan ide. Aña, aksionerlıq cämğiäteneñ 200 mln. sum aqçasın israf itü, şunıñ yartısın üzenä alu turında ğayıpläw belderelde. Xänäfi Garipov, general' direktor bularaq, 2003 yıldan başlap, Sankt - Peterburg, İske Osqol, Sverlau häm Çiläbe ölkälärendäge timerçelek kombinatlarınnan eşkä yaramaslıq çimal satıp alğan. Ä menä aqçanı yaxşı çimal öçen küçergän. Menä şuşı ğäyepläwlärne tikşerüçelär ozaq öyränälär. Läkin ğäyeplänüçe Garipov ber genä ğäyepläwne dä tanımıy. Näticädä, 200 mln. sum aqçanı tuzdıru turındağı eşne Çallı mäxkämäse döres tügel dip taptı, mäxkämä barışında prokuror üze dä general' direktornı bu yünäleştä ğayıbe bulmawın, ğomumän, cinayät bulmawın kürsätä. Şul uq waqıtta prokuror, X.Garipovnı xezmät wazıyfalarınnan üzbeldegençä faydalanu, berläşmäneñ salımnarın tülämäwdä ğayıpläw belderde. Xäzer inde süz 200 mln. sum xaqında tügel, 3 mln turında bara. Prokuratura wäkile şuşı soñğı ğayıpläwlärgä nigezlänep, Xänäfi Garipovqa 2 yıl koloniä - poselenie birüne sorıy. Aldağı ğäyepläwlär buyınça general' direktorğa 10 yıl törmä yanağan. Xänäfi Garipov tikşerü astında bulsa da, direktor wazifasınnan kitü turında ğariza yazmağan. Şulay da, bıyılnıñ mart ayında KamAZ aksionerlıq cämğiäte direktorlar şurası anı idärädän çığaru turında qarar qabul itä. Bulğan mäxkämä eşlärenä jurnalistlar kertelmi. Yaqın arada soñğı mäxkämä utırışı bulaçaq.

XS
SM
MD
LG