Accessibility links

якшәмбе, 11 декабрь 2016, Казан вакыты 09:00

Alinä Kabaewa Tatarstan belän kileşü tözede


Näfis gimnastiqa sportçısı Alinä Kabaewa yarışlarda Mäskäw belän berrättän Tatarstan danın da yaqlayaçaq. Alinäneñ Qazanğa kilüeneñ maqsatı da şul uñaydan kileşü tözü. Matbuğat oçraşuında töp häm şaqqattırğıç yañalıq şul buldı. Monı xätta Gazeta.ru kebek federal' saytlar da tiz arada yazdı. 23 yäşlek millättäşebez Alinä Kabaewa berençe tapqır Qazanğa 2004 yılnıñ közendä kilgän ide, Tatarstan Prezidentı Mintimer Şäymiev belän dä oçraştı. Şul waqıtta Alinä Qazan belän soqlanuın da belderde, üzeneñ tatar buluına basım yasıy başladı. Can tartmasa da qan tarta dilär bit. Alinäneñ änise rus bulsa, ätise Marat Kabaev Taşkentta yäşäwçe tatar. Küplärgä ul “Paxtakor” futbol komandası arıqlı tanış. Kabaewalarnıñ tuğannarı Qazanda da yäşi. Tinçurin teatrı artistı İslamiä Mäxmütova. Uzğan yılnı Marat Kabaev alarda şaqtıy qunaq ta bulğan. Bu xaqta “Azatlıq” radiosına İslamiä Mäxmütovanıñ qızı Läysän belderde. Matbuğat oçraşuında Alinä Kabaewa tatarlığına älläni basım yasamasa da, mindä tatar qanı ağa dip äytep uzdı uzuın. Yarışlarda kiläçäktä Alinäneñ Mäskäw belän berrättän Tatarstan danın da yaqlawın Rusiäneñ näfis gimnastika baş trenerı İrina Viner Gazeta.ruğa respublikanıñ material', yäğni aqçalata yärdäm itep kilüe belän añlattı. Kabaewağa ğına tügel, ä ğomumän näfis gimnastikağa. Şulay inde kem tüli, şul şart quya. Tatarstannıñ Alinä Kabaewa belän kileşüe 2008 yılda Pekindağı Olimpiä uyınnarına qädär isäplängän. Ä Kabaewanıñ kiläse yarışı tizdän Mäskäwdä “Krıylatskoe” sport kompleksında uzaçaq Yevropa çempionatında bulaçaq. Alinä Afinada uzğan Olimpiä uyınnarında qatnaşqannan soñ yal itü waqıtında üz isemendäge balalar sport mäktäben tözärgä bulğan. Häm bu eş belän dä şöğellänä. Ä Pekindağı Olimpiadadan soñ Alinä (aña ul waqıtta 25 yäş bulaçaq) yuğarı belem alırğa häm professional' trener yäğni ostaz bulırğa niätli. Ul Tatarstan yäşlär eşläre, sport häm turizm ministrlı Marat Barıyevqa Tatarstanda näfis gimnastika üssen öçen Mäskäw trenerların çaqırırğa täqdim itte.

Landış Xarrasova

XS
SM
MD
LG