Accessibility links

дүшәмбе, 5 декабрь 2016, Казан вакыты 13:37

İzrail ğäskärläre Gazağa kerde


Sintäber ayında İzrail ğaskärläreneñ Gazadan çığıp kitkänennän birle mondıy höcümneñ bulğanı yuq ide. Uzğan töndä İzrail xärbi oçqıçları küperlärne utqa tottı, elektr stansiäsenä höcümnän soñ Gazanıñ zur öleşe utsız qaldı. Bu ğämälne İzrail , yäkşämbe könne fälestin suğışçılarınıñ höcümennän soñ ber İzrail xärbieneñ totıq itep aluınnan soñ eşläde. Räsmilär, İzrail xökümäteneñ Gazanı yañadan üz kontrolenä alu niäte yuq, di.

Barısı da fälestin suğışçıları tarafınnan totıq itep alınğan ber İzrail xärbien qotqaru öçen eşlänä. Premyer-ministr Ehud Olmert, İzrail, xärbine qaytaru öçen "kisken çaralarğa da barırğa äzer" dip belderde. Xärbi çaralar däwam itä. Ämma Olmert süzlärençä, İzrail Gazanı yañadan üz kontrolenä alırğa cıyınmıy.

19 yäşlek Gilead Şalitnı fälestin suğışçıları yäkşämbe, 25 yün könne İzrail tikşerü noqtasına bulğan höcüm waqıtında totıq itep alğan ide. Eşneñ zurlığı şunda – İzrail xärbilärneñ fälestinnär tarafınnan inde 12 yıl totıq itep alınğanı yuq ide. Şalitnı üzlärendä totqan suğışçılar barısı da Hämas citäkçelegendäge fälestin xakimiäte belän elemtädä tora. Totıq aluçılar İzrail törmälärennän xatın-qızlarnı häm 18 yäşe citmägän üsmerlärne çığarunı taläp itä. Ämma Olmert kisken räweştä, suğışçılar belän bu mäsälädä söyläşü bulmayaçaq, dip belderde.

İzrail xärbi köçläreneñ matbuğat wäkile Jakub Dälläl, ğäskärlär, Şalitnı fälestinnärdän azat itü öçen xärbi çaralarnı däwam itergä äzer, dip belderde:

"Fälestin xakimiäte häm häm terror oyışmalarına, bezneñ niätlär citdi dip äytäsebez kilä. Kiräk bulsa çaralarnı däwam itäçäkbez. Bu yulı axırı yaxşı bulır, xärbi isän-imin öyenä qaytır, dip ömetlänäbez. Yuq isä – xäl itü çarası İzrail saqlanu köçläre qaramağında, häm bez xärbine kire qaytarır öçen barısın da eşliäçäkbez."

Tönge höcümdä İzrail oçqıçları Gazanıñ tönyağı belän könyağın totaştırğan 3 küperne cimerde, raketalarnıñ berse üzäk Gazanı su belän tämin itep torğan su ütkärgeçenä eläkte. Şähärdäge iñ zur elektr stansiäsenä raketa töşep Gazanıñ yartısı eletr energiäsez qaldı. Şunnan soñ İzrail tankları häm xärbilär çik aşa ütep Gazanıñ könçığışındağı Rafah şähäre tiräse häm taşlandır ber hawa mäydanına urnaştı.

Hämas citäkçelegendäge xökümätneñ vise-premyerı Nasserdin äl-Şäer, totıq aluçılarğa "Şalitnıñ ğömeren saqlarğa häm yaxşı möğämälä kürsätergä quşıldı" dip belderde, ämma xärbineñ yazmışı İzrail xökümäteneñ qararına bäyle, dide äl-Şäer.

İzrail xärbi çaraların kisken ğäyepläp, vise-premyer, fälestin xökümäte bügenge wazğiätne çişü yulların ezli, dip belderde.

Xökümät wäkile Ğäzi Hamad, nizaqnıñ tirängä kitüen buldırmas öçen ğäräp dönyası häm xalıqara räsmilär belän söyläşülär däwam itä, dide. Ämma Hämasnıñ başqa ber äğzası, oyışmanıñ Livandağı wäkile Osama Hamdan, İzrail ğäskärläreneñ Gazağa kerüe – fälestinnärne üz taläplärennän çigendermiäçäk, dip belderde. Ägär dä İzrail törmälärdän totqınnarnı çığarmasa fälestin suğışçıları İzrail xärbilären urlawnı häm üterüne däwam itäçäk, dide Hamdan.

Wazğiätne qatlawlandırğan tağın ber belderü yasaldı. Xärbine totıq alu çarasına qatnaşqan qarşı toru xalıq komitetları oyışmasınıñ matbuğat wäkile Abu Abir, Könbatış Yarda urlanğan tağın ber İzrail keşesen üterü belän yanadı. İtamar awılınnan bulğan Eliyahi Pinhas Aşeri isemle 18 yäşlek yegetne ğailäse dä yuğalğan dip xäbär itkän ide. Fälestin suğışçıları, ägär dä İzrail xärbi çaraların tuqtatmasa – yegetne üterü belän yanadı.

Alsu Qormaş
XS
SM
MD
LG