Accessibility links

пәнҗешәмбе, 8 декабрь 2016, Казан вакыты 11:09

“Yoldızlıq”qa şura kiräkme?


“Yoldızlıq”nıqnıñ İğänäçelär şurasınıñ berençe utırışın respublikanıñ mädäniät ministrı Zilä Wälieva alıp bardı. Cıyılıp söyläşügä jurnalistlar, festival'ne oyıştıruda qatnaşuçılar, matdi yärdäm kürsätüçelär häm başqa “Yoldızlıq” belän yanuçılar cıyılğan ide. Ğädättägeçä utırış rus telendä uzdı. Mädäniät ministrı söylägänçä, İğänäçelär şurasınıñ eşçänlege sälätle, biyuçe - cırçı balalarğa, festival'dä qatnaşuçılarğa yärdäm itü. Yäş yeget-qızlarnıñ estrada eşçänlekläre däräcäsen üsterergä etärgeç birü. Bu “Yoldızlıq” şurasına xakimiättä eşläwçelär, Tatarstannıñ ictimaği palata wäkilläre, oyışma citäkçeläre, sänğät ähelläre, eşmäkärlär, küp kenä massaküläm mäğlümat çaraları kerä. Alarğa festival'ne oyıştıruçılar zur ömetlär bağlıy. Älege iğänäçelär şurası kiläçäktä üzenä tağın da kübräk ictimaği oyışmalarnı, şirkätlärne tartırğa niätli. Çönki “Yoldızlıq”ta qatnaşuçılarnıñ sanı da xäyran ğına artqan, 2001 yılda 4500 qatnaşuçı bulsa, bıyıl isä anda qatnaşçılar 70 meñ bulğan. Alarğa törle yaqlap yärdäm, xästär kiräk. Ä anıñ öçen sponsorlar niqädär kübräk bulsa şulqädär yaxşı di oyıştıruçılar. Monda tatar balalarımı ällä başqa millät balaları biep cırlıymı soñ digän sorawğa häm ğomumän “Yoldızlıq” xaqında festival'dä 2 yıl jyuri äğzası bulğan Tatarstannıñ xalıq artistı Zilä Sönğatullina söyli: - Bu böten millätlärneñ duslıq festivale. Monda tatar, rus başqa millät dip ayırıp qaraw yaramas. Repertuar mä’säläsendä dä şulay, sez bu teldä, sin bu teldä cırla digän närsä yuq. İñ möhime üzeneñ talantın kürsätä alsın. Annarı menä bu iğänäçelär şurası bik kiräkle äyber bulır dip uylıym. Çönki şul uq cır-biyu törkemnäreneñ säxnädä totışların, niçek biergä kiräklekne kürsätüçe uqıtuçılarnı da cälep itep bulmas mikän digän uy da bar. Prezident qararı belän oyışqan festival'neñ problemaların, “Yoldızlıq” proektı avtorı Dmitriy Tumanov äytergä qıyınsınıp qına citkerde. Alar isä, festival'dä qatnaşırğa teläwçelärgä Qazanda uqıtuçılar belän tä'min itelgän üzäk bulmaw. Yıraq töbäk, rayonnardağı balalarnı alıp kilü, yäşätü-yörtü yağınıñ yomşaqlığı. Apparatura bulmaw, Festival'ne arendağa alınğan apparatura belän ütkärü kebek kitekleklärne “Yoldızlıq”nıñ iğänäçelär şurasına beteräse qala. Röstäm İsxaqi

XS
SM
MD
LG