Accessibility links

дүшәмбе, 5 декабрь 2016, Казан вакыты 19:52

Yaqın Könçığışta xärbi häm diplomatik çaralar


İzrail totıq itep alınğan üz xärbien qotqaru çarasın däwam itä. Uzğan töndä İzrail xärbi oçqıçları 20dän artıq xädäfne utqa tottı, alar arasında fälestin eçke eşlär ministrlığı da buldı. Xärbi basım belän ber rättän nizaqnı caylar öçen Mısır yardämendä diplomatik tırışlıqlar da kürelä.

Ğaza sızığına bulğan höcümnärdä kimendä ber keşe, fälestin suğışçılarınıñ İslam Cihadı törkeme äğzase häläk bulğan dip xäbär itelä. Nizaq 25 yün, uzğan yäkşämbe könne fälestin suğışçılarınıñ Gilad Şalit isemle İzrail xärbien totıq itep alğannan soñ tirängä kitte. 29 yün, pänceşämbe könne İzrail iminlek köçläre Xämas citäkçelegendäge fälestin xökümäteneñ distälägän wäkilen häm deputatlarnı qulğa aldı. İzrailneñ bu ğämälen BMO wäkile täñqitläp çıqtı:

"Qulğa alularnıñ mäğnäsen añlamıym. Añlawımça, xärbi çaranıñ maqsatı – İzrail xärbie Gilad Şalitnı azat itü, şuña kürä bu ğämälne añlamıym."

İzrail räsmiläre üz taläplärendä qatı tora. Eçke eşlär ministrı Avi Dichter kiçä, xärbi azat itelmäsä – Xämas citäkçelegendäge xökümätkä qarşı çaralar däwam itäçäk, dip belderde:

"Xämas täğlimatenä yaqın bulğan, terror, İzrail keşelären üterügä qatnaşı buluda şiklänelgän här keşene bez törmägä utırtaçaqbız."

Xämas citäkçelege üz wäkilläreneñ qulğa alınuın "suğış ğämäle" dip atadı. Ğazada kön sayın, fälestinnärne törmädän çığarmıy torıp İzrail xärbien azat itmäskä taläp itep uram cıyınnarı ütä.

Fälestin deputatı häm Xämasnıñ matbuğat wäkile Muşir äl-Masri, kiçäge uram cıyınında, üz xoquqlarıbızdan baş tart,ayaçaqbız, dip belderde:

"Ülsäk tä İzrailne ber qayçan da tanımayaçaqbız, üz xoquqlarıbızdan baş tartmayaçaqbız."

Kierenkelekneñ könnän kön artuına qaramastan ber yulı diplomatik säxnädä dä Mısır prezidentı Hösni Möbäräk qatnaşlığında nizaqnı çişü tırışlığı däwam itä. Äl-Ahram basmasına birgän äñgämäsendä, Möbäräk, Xämas citäkçelege Şalitnı azat itergä rizalaştı, dip belderde. Ämma şartları turında ber süz dä äytmäde. İzrail baştan uq ber nindi dä şartlar da ütälmiäçäk, dip belderde. Diplomatiä uñışqa ireşmäsä, kierenkelek tağın da artaçaq.

Çärşämbedän birle yözlägän meñlek Ğaza xalqı elektr energiäsez utıra. 28 yün könne İzrail boralaqları elektr stansiäsen utqa totqannar ide.

BMOnıñ humanitar yardäm koordinatorı Jan Egeland, Ğaza sızığı xäzer qıtlıq kiçerä, dip belderde. İzrailne ul, "tınıç xalıqqa ziyan kitermiçä, xalıqara qanunnar qısalarında eş itergä" çaqırdı. Zur Sigezlek illäre dä İzrailne totnaqlıqqa çaqırdı.

Alsu Qormaş
XS
SM
MD
LG