Accessibility links

Alsunıñ tuğan könen Başqortstanda ütkärdelär




Populyar cırçı Alsu Safina, äti-änise, yaqın tuğannarı häm icattaş dusları belän Başqortstanğa qunaqqa kilde. Ätise Ralif Safinnıñ tuğan awılı – İleş rayonınıñ Uyandıq awılına bardı alar. Biredä Alsunıñ tuğan köne – 23 yäşe tulu uñayınnan, zur bäyräm oyıştırdılar.

Bıyılğı tuğan könen Başqortstanda bäyräm itüen Alsu üze bolay añlattı:“Yaratqan nänäyem, ätiemneñ änise, çirläp toru säbäple, minem tuyıma Mäskäwgä bara almağan ide. Şuña da äle menä üzebez qaytırğa buldıq. Qartäniemne üzemneñ ğömerlekkä saylağan tormış iptäşem Yan belän tanıştırırğa da uyladım”.

Kartinäse Xalidä apa Alsunıñ kiäwen niçek bäyälägänder, anısı xaqında mäğlüm tügel. Şulay da elegräk, anıñ yaratqan onığı Alsunıñ tatar yegetenä tügel, ä başqa millät keşesenä kiäwgä çığuın önämäwe xaqında xäbärlär taralğan ide.

Niçek bulsa da bulğandır, ämma İleş rayonı Uyandıq awılında oyıştırılğan bäyräm çaraları kiñ qolaçlı ide. Awılğa qaytıp töşügä yäşlär, barlıq tuğannarı belän bergäläp, “Xalidä” mäçetenä barıp kilde. Älege Xoday yortın Alsunıñ ätise Ralif Safin änise Xalidä apa xörmätenä tözetkän ide.

Uyandırta Alsunıñ tuğan könen ütkärü, açıq hawada, işegaldında bik küp öställär quyıp ütkärelde. Ä kiçen Alsu häm anıñ icattaş dusları awıl mädäniät yortı aldında matur konsert kürsätte. Anda Alsu üzeneñ “Ätiemä” digän tatarça cırın da başqardı. Tamaşanı qararğa dip tirä-yaq awıllardan da, rayon üzägennän dä cämğısı ike meñgä yaqın keşe cıyılğan ide. Alsunıñ tuğan kön bäyrämenä noqtanı ozaq däwam itkän salyut quydı.

Fänis Fätxi, Ufa

XS
SM
MD
LG