Mäktäplärdä, çığarılış sıynıf uquçıları öçen zur sınaw ayı bulğan iyün uzıp kitte. Uquçılar, menä ikençe yıl inde berdäm däwlät imtixannarı tapşırdılar. Bıyılğısı şunısı belän üzençälekle, balalarğa tatar telendä dä berdäm däwlät imtixannarı tapşıru mömkinçelege tudırıldı häm ul başqaçaraq, berdäm respublika imtixannarı dip atala. Ğomumän alğanda, Tatarstanda 45 meñ uquçınıñ 34 meñnän artığı, Çallıda 6 meñ uquçınıñ 4500е berdäm däwlät imtixannarında qatnaşqan. Bu mäğlümätlärne "Azatlıq xäbärçese Çallı şähär mäğärif idäräsennän aldı. İdäräneñ milli bülek başlığı Viner Xämitov äytüençä, Rusiä külämendä imtixannar buyınça soñğı näticälär älegä iglan itelmägän, şuña kürä tatarça imtixan birgän Çallı uquçılarınıñ kürsätkeçlären Mäskäw yäki Samara uquçılarınıqı belän çağıştırıp qaraw mömkinlege yuq . Şulay da, şähärdäge urıs häm tatar mäktäplärendäge imtixannar näticäsendä ayırma yuq däräcäsendä ikän. İmtixannarnı tatar telendä birü öçen respublikanıñ qayber şähär häm rayonnarında uquçılar Çallığa kilgännär.
Alğa taba da berdäm däwlät imtixannarın tatarça birügä ışanıç, ömet barmı soñ ? Çönki, Rusiä mäğärif ministrlığı kürsätmäläre buyınça, uquçınıñ urıs telen yäki ana telen saylarğa xoquqı bar ikän.
Çallı şähär mäğärif idäräseneñ milli bülek başlığı V.Xämitov, kiläçäktä tatar tele fäne buyınça urıs balalarınıñ da berdäm däwlät imtixannarın tatarça tapşıruları mömkin ikän. Çönki, di, bülek başlığı, Çallınıñ här mäktäbendä tatar telen öyränü, uqu, anıñ buyınça imtixan birü mäcbüri quyılğan.Çallıda, urıs balalarınıñ berdäm däwlät imtixanın tatarça birülärenä ışanırğa bula. Çönki, monnan berniçä yıl elek, mäktäptä uquçı, häm mäktäpne tämamlağan urıs balaları tatarça söyläşep, Tatarstan prezidentın da şaqqattırğannar ide.
Ğafiulla Ğaziz, Çallı
