Accessibility links

якшәмбе, 11 декабрь 2016, Казан вакыты 07:08

Bäysezlek könendä Belarus yözen Qıtayğa bora


Bu könnärdä dönyada berniçä däwlät üzläreneñ bäysezlek könnären bilgeli. 4 yüldä – AQŞ Britaniädän, 5sendä – Venesuela İspaniädän bäysezlek yawlağan. Bügen isä möstaqillek könnäre Aljir häm Belarusta bilgelänä. Belarus prezidentı Aleksander Lukaşenka, respublika xalqın qotlap, Belarusta tuğannarnı – bäxetle keşelär dip atadı. Qotlaw çığışında uq Lukaşenka, töp partnerıbız bezneñ xäzer Rusiä tügel, dip belderde.

Belarus bügen bäyräm itte. Respublikanıñ möstaqillege häm Minski şähären nazilardan azat itü köne uñayınnan başqala mäydanında cırçılar häm biyüçelär çığışları, qotlawlar, xärbi yöreş buldı. Xärbi tema bügenge çaralarda iğtibar üzägendä buldı. Prezident Aleksander Lukaşenka üz çığışında, xärbi köçlär, Belarus däwlätenä qarşı här törle höcümgä qarşı toru köçenä iä, dip belderde:

"Milli iminlek, xalıq häm däwlät mänfäğätläre öçen böten çaralar kürelä. Bügenge köndä xärbi köçlär däwlätebezgä qarşı höcümgä qarşı tora ala."

Belarusnıñ bäysezlek köne uñayınnan yasağan çığışına prezident Lukaşenka qısqa ğına ilneñ tışqı säyäsäten bilgeläde dip äytep bula. Belarus çit il aqçalarınnan baş tartmıy, ämma ul aqçalar xalıqnıñ tormışın yaxşırtırğa tieş, dide Lukaşenka. Ä soñğı yıllar täcribäse kürsätkänçä, çit illärgä ışanıp böten äyberdän dä qolaq qağırğa mömkin, dip östäde ilbaşı. İldä tınıçlıq häm totrıqlılıq buldıru – citäkçelek qulında:

"Bu izge könne şunı äytäsem kilä - il citäkçeläre Belarus cirendä tınıçlıq häm totrıqlılıqnı saqlaw öçen böten çaralarnı küräçäk, tınıç tormış häm näticäle xezmät öçen böten şartlarnı tudıraçaq".....

Lukaşenka üz çığışında çit il investorlarınıñ faydasına kübräk ziyanı bulğanın añlattı. Alar şirkät tözegändä kapitalnıñ 100%tın üzeneke buluın teli, däwlättän salım tüläwdä taşlamalar sorıy, eşsezlek iñ küp digändä 5% bulğan Belarusta – eşsezlär probleması yuq, şuña östämä eş urınnarı kiräkmi, dide Lukaşenka.

Rusiä belän Belarus ike möstaqil däwlät berlege bulırğa tieş. Prezident süzlärenä qarağanda bu – xalıqnıñ teläge. Ämma äle mart ayında ğına Lukaşenka, qärdäş Rusiäne – iñ yaqın säwdä partnerı dip atağan bulsa, bügen Belarusnıñ xezmättäşe – Qıtay. Bügenge çığışında prezident – 21nçe ğasırnıñ bu super däwläte belän xezmättäşlekkä Belarus zur ähämiät birä, dide.

Belarus başqalasında 25 urında säxnälär urnaştırıldı, köne buyı konsert-tamaşa däwam itte. Zur iğtibar balalarğa häm küp balalı analarğa birelde, balalar çığış yasadı. İrtänge räsmi çaralar, xärbi yöreş – xärbi marş belän tämamlandı.

Alsu Qormaş
XS
SM
MD
LG