Accessibility links

Кайнар хәбәр

Qazan mäçetläre balalarnı sälämätländerä


Söläyman mäçetendäge möselman balaları alanı bişençe yıl ğämäldä tora. Ruxi häm fizik sälämätländerüne küzdä totqan älege alanğa kilergä teläwçelär şaqtıy küp bula. Yıl sayın törkem-törkem qızlar häm yegetlär mäçetkä kilep künegülär ala, räxätlänep yal da itä. Bıyıl cäyneñ berençe ayında alanda malaylar buldı. Alar Mäskäw, Çiläbe, Yoşkar-Ola, Qazan, Tübän Qama, Yar Çallı häm başqa küp kenä şähärlärdän kilgän ide. 5-6 yäştän alıp 15 qädär bulğan şuşı malaylar, yegetlär 20 kön däwamında islam nigezlären üzläştergän, sport belän şöğellängän.

Älege tärbiäwi çaranı oyıştırğan Söläyman mäçete malaylarğa ayıruça iğtibar belän qarıy. Çönki älege mäçettä qor’än xafizlar äzerläw mäktäbe dä eşläp kilä. Uzğan şimbädä Söläyman mäçetendä balalar belän sawbullaşu tantanası uzğan. Anda Qazan möxtäsibe Mansur xäzrät Cäläletdin da qatnaşqan. Balalar Söläyman mäçete imam-xatıbı İldar xäzrät Bayyazitovqa häm üzläreneñ tärbiäçelärenä, uqıtuçılarına räxmätlären citkergännär. Balalarnı ozatqanda uqu yağınnan da, ädäp-ählaq, sport yağınnan da iñ aldınğılar büläklängän. Mäçet xezmätkärläre alarğa velosiped, muzıkal' üzäk, magnitofon häm başqa büläklär tapşırğan. Ä iñ keçkenälärenä, mäktäpkä barırğa äzerlänüçelärgä mäktäp buqçası birelgän.

5 iyüldän isä Söläyman mäçete alanına üsmer möslimälär cıyılaçaq. Alar biregä şulay uq Rusiäneñ törle töbäklärennän kiläçäk. Älege alannıñ üzençälege tağın şunda. Monda ğadi alanğa kilä almağan, fizik yaqtan zägıyf' bulğan balalar da şöğellänä, yal itä.

Söläyman ğına tügel, Tatarstannıñ başqa küp kenä mäçetlärendä dä mondıy alannar eşläp kilä. Alar Mädinä, Bolğar, Märcäni häm başqa mäçetlärdä bar. Älmirä xanım Ädiätullina şuşı tärbiäwi çaranı Rusiäneñ törle töbäklärendä bulğan mäçetlärdä dä oyıştırırğa kiräk dip sanıy:

Bügenge köndä ğälämät zur tizlek belän taralğan narkomaniä afätennän yäşlärebezne fäqät dini ğilem birü yulı belän genä saqlap buladır.

“Möslimä” gäzite baş möxärrire, “Möslimä” oyışması räise Älmirä Ädiätullina buldı. Ul Qazannıñ Söläyman mäçetendä eşläp kilüçe möselman balaları alanı xaqında söyläde.

Al'bina Zäynulla

XS
SM
MD
LG