Ukraina prezidentı Viktor Yüşçenko sişämbe parlamenttağı säyäsi fraksia başlıqları belän oçraştı. Oppozisiädäge Regionnar firqäse 8 kön elek yaña xökümät tözü eşenä kirtä saldı. Mart ayında saylawlarda tawışlarnıñ küpçelgen alğan bu partia üzenä parlamentta kübräk urın taläp itä. Yüşçenko taraflarnı kileşügä çaqırdı. “Ukraina ul - Yanukoviç, Simonenko, Moroz, Timoşenko häm Bessmertnıy. Bu anıñ bälki bäxeteder, bälki qayber qıyınlıqlarnı küräçägeder. Ämma bu - çınbarlıq. Şuña kürä, bez 5 säyäsi köç arasında kileşügä ireşergä tieş”,- dide Yüşçenko. Regionnar firqäse taläplär ütälgängä qädär parlament eşendä qatnaşmayaçağın belderde.
